Costliest Penthouse Deal: भारतातील सर्वात महागडे पेंट हाऊस, या व्यक्तीने मुंबईत 252.5 कोटींना केले खरेदी

Neeraj Bajaj Costliest Penthouse Deal: देशातील सर्वात महागड्या पेंटहाऊस डीलमध्ये, बजाज ऑटोचे चेअरमन नीरज बजाज यांनी मुंबईतील मलबार हिल येथे 252.5 कोटी रुपयांना सी-फेसिंग अपार्टमेंट विकत घेतले आहे.

हा देशातील सर्वात महागडा पेंटहाऊस करार असल्याचे बोलले जात आहे. यापूर्वी, या वर्षाच्या सुरुवातीला दोन सर्वात मोठे सौदे केले गेले होते, एक वेलस्पन समूहाचे अध्यक्ष बीके गोयंका आणि दुसरे एव्हेन्यू सुपरमार्ट्सचे राधाकृष्ण दमानी यांनी.

नीरज बजाज यांनी 13 मार्च रोजी करारावर स्वाक्षरी केली

मीडिया रिपोर्ट्सनुसार, 1 मे 2021 पासून बजाज ऑटोचे चेअरमन म्हणून काम करत असलेल्या नीरज बजाज यांनी मॅक्रोटेक डेव्हलपर्सकडून लक्झरी अपार्टमेंट विकत घेतले आणि सोमवार, 13 मार्च रोजी करार झाला.

अहवालानुसार, तीन अपार्टमेंटचे एकूण क्षेत्रफळ 18,008 चौरस फूट आहे आणि त्यामध्ये आठ कार पार्किंग स्लॉट आहेत. अपार्टमेंट्स लोढा मलबार पॅलेसमध्ये आहेत, ज्यात 31 मजले आहेत. या करारासाठी 15.15 कोटी रुपयांचे मुद्रांक शुल्क भरण्यात आल्याचे अहवालात नमूद करण्यात आले आहे.

हे दोन मोठे सौदे फेब्रुवारीतच झाले

फेब्रुवारीमध्ये वेलस्पन ग्रुपचे चेअरमन बीके गोयंका यांनी ओबेरॉय रियल्टीच्या लक्झरी प्रोजेक्ट थ्री सिक्स्टी वेस्टमध्ये वरळीत 230 कोटी रुपयांना पेंटहाऊस खरेदी केले होते.

मीडिया रिपोर्ट्सनुसार, गोएंका यांचे पेंटहाऊस टॉवर बी मध्ये 63 व्या मजल्यावर आहे आणि ते 29,885 स्क्वेअर फूट कार्पेट एरियामध्ये पसरले आहे.

अपार्टमेंटमध्ये 4,815 चौरस फूट टेरेस क्षेत्र, 411 चौरस फूट अतिरिक्त क्षेत्रफळ आणि 13,0951 चौरस फूट फ्री सेल लॅंड आहे.

गेल्या महिन्यात, DMart चालवणाऱ्या Avenue Supermarts चे संस्थापक राधाकिशन दमाणी यांनी देखील भारतातील सर्वात मोठ्या रिअल इस्टेट (Real Estate) डीलमध्ये सुमारे 1,238 कोटी रुपयांना 28 लक्झरी अपार्टमेंट्स खरेदी केल्या होत्या.

3 फेब्रुवारी रोजी मुंबईतील (Mumbai) विविध भागात एकूण 1,82,084 चौरस फूट चटईक्षेत्र असलेल्या या व्यवहारांची नोंद झाली.