मनी लाँड्रिंग प्रकरणात आयएएस अधिकारी पूजा सिंघल यांना अटक

झारखंडमध्ये तैनात असलेल्या IAS पूजा सिंघल यांना ईडीने मनी लॉन्ड्रिंग प्रकरणात अटक केली आहे. पूजा सिंघल या झारखंडच्या खणन सचिव आहेत. खुंटी येथील मनरेगा योजनेतील पैशाच्या कथित गैरव्यवहारासंबंधी त्या मंगळवारी अंमलबजावणी संचालनालयासमोर हजर झाल्या होत्या. ईडीने त्यांचा जबाबही नोंदवला होता. 2000 बॅचचे आयएएस अधिकारी सिंघल यांना ईडीने अनेक प्रश्न विचारले होते. 6 मे रोजी, ईडीने झारखंडसह इतर काही ठिकाणी टाकलेल्या छाप्यांमध्ये सिंघल आणि त्यांचे व्यावसायिक पती अभिषेक झा यांची चौकशी केली होती.

दरम्यान, पूजा यांचे पती अभिषेक यांनाही अटक करण्यात आली आहे. आज सलग दुसऱ्या दिवशीही अभिषेक यांची चौकशी करण्यात आली. पती-पत्नी, दोघांची आज समोरासमोर बसून चौकशी करण्यात आली. अंमलबजावणी संचालनालयाने अभिषेक यांच्या पल्स हॉस्पिटलवरही छापा टाकला. पल्स हॉस्पिटलमध्ये (Hospital) गुंतवणूक कुठून आली असा प्रश्न अभिषेक झा यांना विचारण्यात आला. त्यांच्या पत्नी पूजा सिंघल यांचाही या रुग्णालयाच्या उभारणीत हातभार आहे का? अभिषेक झा यांना विचारले जात आहे की, हॉस्पिटलमध्ये 123 कोटींहून अधिक गुंतवणूक (Investment) झाली असताना, कर्ज केवळ 23 कोटीच कसे दाखवले? बाकीचे पैसे आले कुठून? पूजा सिंघल यांची यात काही भूमिका आहे का? या सर्व प्रश्नांची उत्तरे आतापर्यंत ईडीला मिळू शकलेली नाहीत.