West Bengal: हावडामधून दोन संशयित दहशतवाद्यांना अटक, ISIS शी संबंध असल्याचा आरोप

Two Terrorist arrested In Howrah: पश्चिम बंगालमधील हावडा येथून मोठी बातमी समोर आली आहे. कोलकाता पोलिसांच्या एसटीएफने हावडा येथून दोन संशयित दहशतवाद्यांना अटक केली आहे. या दोन्ही आरोपींवर ISIS या दहशतवादी संघटनेशी संबंध असल्याचा आरोप आहे. अटक करण्यात आलेल्या आरोपींपैकी एक एम.टेक.चा विद्यार्थी असल्याचे सांगण्यात येत आहे.

दरम्यान, अटक करण्यात आलेल्यांकडून अनेक संशयास्पद कागदपत्रे जप्त करण्यात आली आहेत. एसटीएफचा दावा आहे की, आरोपी जिहादी कारवायांमध्ये सामील आहेत. त्याचबरोबर, ते सोशल मीडियाच्या माध्यमातून तरुणांचे ब्रेनवॉश करायचे. दोन्ही आरोपींना 19 जानेवारीपर्यंत पोलीस कोठडी सुनावण्यात आली आहे.

पोलीस लक्ष ठेवून होते

एका वरिष्ठ पोलीस अधिकाऱ्याने प्रसारमाध्यमांशी बोलताना सांगितले की, दोन्ही आरोपींवर बराच काळ नजर ठेवण्यात आली होती. कोलकाता पोलिस (Police) एसटीएफच्या पथकाने शुक्रवारी (6 जानेवारी) रात्री टिकियापारा येथील आफताबुद्दीन मुन्शी लेन येथून दोघांना ताब्यात घेतले.

सूत्रांनी दिलेल्या माहितीनुसार, आरोपी खिदिरपूरमध्ये गुप्त बैठक आयोजित करणार होते. शस्त्रे गोळा करण्याचाही दोघांचा बेत होता.

दोन्ही आरोपींची ओळख पटली

गुल मोहम्मद सद्दाम, रा. आफताबुद्दीन मुन्सी लेन, टिकियापारा, हावडा असे एका आरोपीचे नाव आहे. तो एम.टेकचे शिक्षण घेत आहे. आरोपीचे वडील रेल्वेतून निवृत्त आहेत. तर सईद हुसेन असे दुसऱ्या आरोपीचे नाव आहे. दोघेही पाकिस्तान आणि मध्य आशियातील अनेक देशांतील दहशतवादी हस्तकांशी थेट संपर्कात असल्याचा पोलिसांचा आरोप आहे.

19 जानेवारीपर्यंत पोलिस कोठडीत रवानगी

एसटीएफच्या विशेष सूत्रांनी दिलेल्या माहितीनुसार, आरोपी सोशल मीडियावर देशद्रोही, कट्टरतावादाला प्रोत्साहन देत होते. तरुणांचे ब्रेनवॉश करुन त्यांना जिहादी कारवायांमध्ये सहभागी करुन घेणे हा मुख्य उद्देश होता.

सूत्रांनी दिलेल्या माहितीनुसार, अटक करण्यात आलेल्या आरोपींकडून एक लॅपटॉप, 2 मोबाईल फोन जप्त करण्यात आले आहेत. दोन्ही आरोपींना पोलिसांनी बँकशाल न्यायालयात हजर केले आहे. न्यायालयाने (Court) सध्या दोन्ही आरोपींना 19 जानेवारीपर्यंत पोलीस कोठडी सुनावली आहे.