छत्तीसगडच्या उत्तर भागात जाणवले भूकंपाचे सौम्य धक्के

छत्तीसगडमधील (Chhattisgarh) सूरजपूर जिल्ह्यात गुरुवारी भूकंपाचे सौम्य धक्के जाणवले आहेत. हवामान केंद्राच्या अधिकाऱ्यांनी या बाबत माहिती दिली आहे. गुरुवारी सकाळी 11.57 च्या सुमारास सूरजपूरमध्ये भूकंपाचे सौम्य धक्के जाणवले, याबाबत अधिकाऱ्यांनी सांगितले आहे. (Mild Earthquake In Chhattisgarh)

ते म्हणाले की, भूकंपाची तीव्रता रिश्टर स्केलवर तीन इतकी मोजण्यात आली आहे. तसेच भूकंपाचा केंद्रबिंदू जमिनीपासून सुमारे 10 किमी खाली होता. भूकंपामुळे कोणतीही हानी झाली नसल्याचे अधिकाऱ्यांनी यावेळी सांगितले. या परिसरात आतापर्यंत कोणत्याही प्रकारचे नुकसान झाल्याचे वृत्त नाही.

त्याचवेळी, सूरजपूरच्या जिल्हा दंडाधिकारी कार्यालयाच्या अधिकाऱ्यांनी सांगितले की, या भागामध्ये भूकंप झाल्याचे वृत्त आहे. अद्याप या परिसरात जीवित व वित्तहानी झाली नाही. या संदर्भात अधिक माहिती घेतली जात आहे तसेच गेल्या महिनाभरात राज्याच्या उत्तरेकडील जिल्ह्यांमध्ये भूकंपाचे धक्के जाणवण्याची ही तिसरी वेळ आहे.