पैगंबर विवाद: यूपीतील अनेक जिल्ह्यांत नमाजानंतर गोंधळ; प्रयागराजमध्ये दगडफेक

भाजप प्रवक्त्या नुपूर शर्मा यांनी पैगंबर मोहम्मद यांच्याबद्दल केलेल्या वक्तव्याविरोधात उत्तर प्रदेशातील मुस्लिम बांधवांनी सलग दुसऱ्या शुक्रवारी विविध जिल्ह्यांमध्ये निदर्शने केली. यातच प्रयागराजमध्ये तणावपूर्ण परिस्थिती निर्माण झाली आहे. अटाळामध्ये शुक्रवारच्या नमाजानंतर पहिल्यांदा घोषणा देण्यात आल्या आणि त्यानंतर गदारोळ झाला. (Protests erupted in several districts of Uttar Pradesh against Nupur Sharma's remarks about Prophet Mohammad)

दरम्यान, पोलिसांनी (Police) आंदोलकांना थांबवण्याचा प्रयत्न केला असता दगडफेक सुरु झाली. त्यानंतर पोलिसांनीही लाठीचार्ज करुन दंगल करणाऱ्या लोकांचा पाठलाग केला. वरिष्ठ पोलिस अधिकारीही घटनास्थळी दाखल झाले आहेत. प्रयागराजसोबतच (Prayagraj) लखनऊ, मुरादाबाद आणि सहारनपूरमध्येही गदारोळ झाला.

दुसरीकडे, प्रयागराजमध्ये डीएम संजय कुमार खत्री आणि एसएसपी अजय कुमार हे देखील शुक्रवारच्या नमाजपूर्वी जामा मशिदीबाहेर पोहोचले आणि लोकांना शांततेचे आवाहन केले. शुक्रवारच्या नमाजानंतर अटाळा चौक आणि आजूबाजूच्या रस्त्यावर उपस्थित अल्पवयीन मुलांनी गोंधळ घालण्यास सुरुवात केली. रस्त्यावरील मुलांनी पोलिसांच्या पथकावर दगडफेकही केली. यामध्ये अर्धा डझनहून अधिक पोलीस कर्मचारी जखमी झाले.

तसेच, पोलिस अधिकारी लोकांना समजवण्याचा प्रयत्न करत आहेत, मात्र जमावाचा गोंधळ सुरुच आहे. मोठ्या संख्येने पोहोचलेल्या लोकांनी नुपूर शर्मांना फाशी देण्याची मागणी केली. पोलीस आणि प्रशासनातील अधिकारी तणावाच्या वातावरणात वाटाघाटी करण्याचा प्रयत्न करत आहेत.

त्याचवेळी, सहारनपूरमध्ये मुस्लिम समाजातील लोकांनी गोंधळ घातला. शुक्रवारच्या नमाजानंतर सहारनपूरच्या रस्त्यावर उतरलेल्या मुस्लिम (Muslim) समाजातील नागरिकांनी मशिदीबाहेर 15 ते 20 मिनिटे घोषणाबाजी केली. सहारनपूरमधील जामा मशिदीत दुपारी 1 वाजता शुक्रवारची नमाज सुरु झाली. यानंतर नमाज संपवून नमाजी मशिदीतून बाहेर आले तेव्हा त्यांनी जोरदार घोषणाबाजी सुरु केली. हातात तिरंगा घेऊन आलेल्या तरुणांनी निदर्शनेही केली. यानंतर अधिकाऱ्यांनी सर्वांची समजूत काढण्याचा प्रयत्न केला, त्यानंतर निदर्शने करुन सर्वजण आपापल्या घरी परतले.