सिध्दु मुसेवाला मर्डर केसचं महाराष्ट्र कनेक्शन, अरुण गवळीचं नाव आलं समोर

Sidhu Moosewala Murder Case: पंजाबी गायक सिद्धू मुसेवाला खून प्रकरणाचे महाराष्ट्र कनेक्शन आता मुंबई अंडरवर्ल्ड डॉनशी जोडले गेले आहे. या प्रकरणात गुंड अरुण गवळी (Don Arun Gawli) उर्फ ​​डॅडीचे नाव पुढे येत आहे. पंजाब पोलिसांनी ओळखलेल्या आठ शार्प शूटरपैकी एक संतोष जाधव (Santosh Jadhav) आहे. जाधव हा पुण्याचा रहिवासी असून तो गवळी टोळीचा मोरक्या असल्याचे सांगण्यात येत आहे. पंजाब पोलिसांनी (Punjab Police) दिलेल्या माहितीनुसार, संतोष जाधवला खास मुंबईतून बोलावण्यात आले होते. 29 मे रोजी सायंकाळी 5.30 वाजता सिद्धू मुसेवालाची गोळ्या झाडून हत्या करण्यात आली होती.

संतोष जाधव यांच्यासोबत महाराष्ट्रातील सौरभ महाकाळलाही पंजाबमधील मानसा भागात बोलावण्यात आले होते. याप्रकरणी पुढील तपासासाठी पंजाब पोलिसांनी महाराष्ट्र आणि मुंबई पोलिसांची मदत मागितली आहे. डॉन अरुण गवळी सध्या तुरुंगात आहे.

क्राइम जगातला 'डॅडी', दाऊद इब्राहिमशी पंगा घेणारा डॉन अरुण गवळीला 90 च्या दशकात मुंबई अंडरवर्ल्डमध्ये सुपारीचा बादशाह म्हटले जायचे. पांढरी टोपी आणि पांढरा कुर्ता परिधान केलेल्या गवळीचा अंडरवर्ल्ड डॉन दाऊद इब्राहिमसोबत छत्तीसचा आकडा होता. अरुण गवळीने दाऊद इब्राहिमच्या मेव्हण्याला त्याच्या शूटरने मारले होते, असे म्हटले जाते. क्राइम जगात त्याला 'डॅडी' म्हटले जायचे. दाऊद इब्राहिम आणि छोटा राजनसारखे डॉन 1990 मध्ये मुंबईतील टोळीयुद्धादरम्यान देश सोडून पळाले होते.

दरम्यान पंजाबी गायक सिध्दु मुसेवाला हत्येप्रकरणी पंजाब पोलिसांनी लॉजिस्टिक सपोर्ट, रेक चालवणे आणि शार्प शुटरला आश्रय दिल्याबद्दल किमान आठ जणांना अटक केली आहे. अटक करण्यात आलेल्यांमध्ये संदीप ऊर्फ केकरा (सिरसा, हरियाणा), मनप्रीत सिंग ऊर्फ मन्नू झातलवंडी साबो (भटिंडा), मनप्रीत भाऊ (फरीदकोट), सराज मिंटू (अमृतसर), प्रभू दीप सिद्धू ऊर्फ पब्बी (हरियाणा तख्त माल), मोनू डागर (रेवाडी) यांचा समावेश आहे. पवन बिश्नोई आणि नसीब फतेहाबाद हरियाणाचे रहिवासी असल्याचे सांगितले जाते आहे.

पोलिसांनी या घटनेत सहभागी असलेल्या चार गोळीबारांचीही ओळख पटवली आहे. आयजीपी पीएपी जसकरण सिंग यांच्या नेतृत्वाखालील एसआयटी या प्रकरणाचा तपास करत आहे आणि गुन्ह्यात सहभागी असलेल्या ओळखल्या जाणार्‍या शूटर्स आणि इतर आरोपींना अटक करण्याचे प्रयत्न सुरू आहेत.