CRPF Volleyball: काश्मिरमध्ये हिमवृष्टीत व्हॉलीबॉल खेळतानाचा जवानांचा व्हिडिओ व्हायरल...

CRPF Volleyball Video: सध्या संपूर्ण उत्तर भारत कडाक्याच्या थंडीने ग्रासला आहे. डोंगराळ भागात जोरदार बर्फवृष्टी होत आहे. बर्फवृष्टीमुळे काश्मीर खोऱ्यातील जनजीवन विस्कळीत झाले आहे. खोऱ्याचा उर्वरित देश आणि जगाशी संपर्क तुटला आहे. कडाक्याच्या थंडीत जेव्हा प्रत्येकजण घरात रजईमध्ये लपून उब घेत असताना लष्करातील जवान मात्र पूर्ण निष्ठेने देशसेवेसाठी सीमेवर तत्पर असतात. दरम्यान, सीआरपीएफ जवानांचा व्हॉलीबॉल खेळतानाचा एक व्हिडिओ सोशल मीडियावर मोठ्या प्रमाणात व्हायरल होत आहे.

हा व्हिडिओ दक्षिण काश्मीरमधील शोपियाँ जिल्ह्यातील आहे. बर्फवृष्टीमध्ये सीआरपीएफ जवान व्हॉलीबॉल खेळाचा आनंद घेत असल्याचे या व्हायरल व्हिडिओमध्ये दिसत आहे. मैदानात बर्फ साचला असून त्यावर व्हॉलीबॉलची मॅच रंगलेली या व्हिडिओमध्ये दिसून येत आहे. केंद्रीय राखीव पोलिस दल (सीआरपीएफ) ने हा व्हिडिओ शेअर केला आहे.

दक्षिण काश्मीरमधील कुलगाम, अनंतनाग, पुलवामा आणि शोपियाँच्या विविध भागात दोन फुटांपर्यंत बर्फवृष्टी झाल्याने जनजीवन विस्कळीत झाले आहे. बर्फवृष्टीमुळे अनेक भागांचा संपर्क पूर्णपणे तुटला आहे. ताज्या बर्फामुळे जवाहर बोगद्याजवळ मोठी निसरडी झाल्याने रस्त्यावर अडकलेली वाहने बाहेर काढण्याचे कामही बंद पडले आहे. सकाळी बर्फवृष्टी होऊनही हा रस्ता छोट्या वाहनांसाठी खुला करण्यात आला.

पूंछ आणि राजौरी या दोन जिल्ह्यांना शोपियाँशी जोडणारा मुघल रस्ता, तसेच श्रीनगर-लेह महामार्ग परिसर हिवाळ्यापुर्वीच बंद करण्यात आला होता. काश्मीर खोऱ्यासह आणि जम्मूच्या काही भागात सकाळपासून हिमवर्षाव सुरू आहे.