सोनिया गांधी पुन्हा कोविड पॉझिटिव्ह, सरकारी प्रोटोकॉलनुसार करण्यात येणार क्वारंटाइन

Sonia Gandhi Covid Positive: काँग्रेसच्या हंगामी अध्यक्षा सोनिया गांधी यांना पुन्हा एकदा कोरोनाची लागण झाल्याचे समोर आले आहे. सरकारी प्रोटोकॉलनुसार त्यांना क्वारंटाईनमध्ये ठेवण्यात येणार आहे. काँग्रेस नेते जयराम रमेश यांनी ही माहिती दिली. जयराम रमेश यांनी ट्विटमध्ये लिहिले की, “आज काँग्रेस अध्यक्षा सोनिया गांधी यांचा कोविड-19 चाचणी अहवाल पॉझिटिव्ह आला आहे. सरकारने जारी केलेल्या प्रोटोकॉलनुसार त्या आयसोलेशनमध्ये राहणार आहे."

सोनिया गांधी यांना दोन महिन्यांत दुसऱ्यांदा कोरोनाची लागण झाली आहे. यापूर्वी 2 जून रोजी त्या कोविड पॉझिटिव्ह असल्याचे आढळून आले होते आणि त्यांना दिल्लीतील सर गंगाराम रुग्णालयात दाखल करण्यात आले होते.

कोरोनापूर्वी सोनियांनी या नेत्यांची भेट घेतली होती

कोरोनाची लागण झाल्याचे समोर येण्यापूर्वी सोनिया गांधी यांनी बिहारचे उपमुख्यमंत्री तेजस्वी यादव यांची भेट घेतली होती. बिहार सरकारच्या मंत्रिमंडळ विस्ताराच्या एक दिवस आधी त्यांनी उपमुख्यमंत्री आणि आरजेडी नेते तेजस्वी यादव यांची भेट घेतली होती. त्यांनी सीपीआयएम नेते सीताराम येचुरी यांचीही भेट घेतली.

प्रियांका गांधी कोरोना पॉझिटिव्ह

तीन दिवसांपूर्वी सोनिया गांधी यांची मुलगी आणि काँग्रेस सरचिटणीस प्रियांका गांधी यांचीही कोरोना चाचणी पॉझिटिव्ह आढळून आली होती. त्यांनी आपल्या अधिकृत हँडलवरून ट्विट करून माहिती दिली होती. मला पुन्हा कोरोनाची लागण झाली आहे आणि मी घरी कोविड प्रोटोकॉलचे पालन करत स्वत:ला विलगिकरण करून घेतले आहे. यापूर्वी 3 जून रोजी त्यांचा कोरोना अहवाल पॉझिटिव्ह आला होता. यापूर्वी काँग्रेस नेते जयराम रमेश यांनी सांगितले होते की, सोनिया गांधी यांना श्वसनमार्गात बुरशीजन्य संसर्ग झाला आहे. यापूर्वीच्या कोरोनानंतर त्याच्या नाकातून रक्त येत असल्याची चर्चा होती.