काणकोणात भाजप ‘तिहेरी’ भूमिकेत

काणकोण : काणकोणात सध्या भाजप विरुद्ध भाजप विरुद्ध भाजप असा ‘तिहेरी’ लढा सुरू आहे. भाजपचे अधिकृत उमेदवार रमेश तवडकर हे सध्या भाजपचे माजी उपसभापती इजिदोर फर्नांडिस व भाजपचेच माजी आमदार विजय पै खोत यांच्या कचाट्यात सापडले आहेत. त्यामुळे त्यांची अवस्था ‘इकडे आड, तिकडे विहिर’ अशी झाली आहे. (Political Fight in Canacona News Update)

गतवेळीही अशीच स्थिती होती. पण त्यावेळी या तिघांच्या भूमिका बदलल्या होत्या. त्यावेळी विजय पै खोत हे भाजपचे (BJP) अधिकृत उमेदवार होते. तर तवडकर हे बंडखोराच्या भूमिकेत होते. या दोघांच्या भांडणात कॉंग्रेसच्या इजिदोर यांना लॉटरी लागली होती. पण २०१९ साली त्यांनी भाजपमध्ये प्रवेश केल्यामुळे पुन्हा समीकरणे बदलली.

माजी मंत्री तवडकर यांच्याबरोबर इजिदोर आणि पै खोत हे भाजपकडून इच्छुक होते. पण शेवटी तवडकर यांना उमेदवारी मिळाली. त्यामुळे नाराज फर्नांडिस व खोत यांनी बंडखोरी करून अपक्ष उमेदवारी दाखल केली. परिणामी काणकोणात भाजप तिहेरी भूमिकेत दिसते. याचा लाभ कॉंग्रेसला होतो का,हे बघावे लागेल. कॉंग्रेसने (Congress) भंडारी यांना उमेदवारी दिली असली तरी त्यांना बराच विरोध आहे. तृणमूलचे महादेव देसाई हे पूर्वाश्रमीचे कॉंग्रेसचे. भंडारी यांना संधी दिल्याने त्यांनी तृणमूलशी (TMC) घरोबा केला. एका बाजूला कॉंग्रेसमध्ये दुही तर दुसरीकडे भाजपमध्ये फूट ,अशी सध्या स्थिती आहे. त्यात आपतर्फे अनुप कुडतरकर हे रिंगणात असून आरजीतर्फे प्रशांत पागी हे निवडणूक लढवित आहेत. कनय पागी हे अपक्ष रिंगणात आहेत.काणकोणात जर-तरची समीकरणे सुरू आहेत.