गोव्यातील पहिली ते आठवी शाळेची घंटा वाजणार

पणजी: राज्यात (Goa) नियंत्रणात असलेली कोविड (Covid-19) महामारी, विद्यार्थ्यांचे नुकसान आणि पालकांची शाळा सुरू (Schools Reopen) करण्याची मागणी यावर वैद्यकीय तज्ज्ञ कमिटीने सविस्तर चर्चा करून शाळा सुरू करण्याचा सल्ला राज्य सरकारला (Goa Government) दिल्याने ‘एसओपी’चे (SOP) पालन करत दिवाळी नंतरच्या नव्या सत्रापासून पहिली ते आठवीचे वर्ग सुरू होण्याची शक्यता आहे. त्यामुळे दोन वर्षांपासून बंद असलेली प्राथमिक, उच्च प्राथमिक आणि माध्यमिक वर्गांची घंटा आता पुन्हा वाजणार आहे.

कोरोनामुळे सलग दोन वर्षांपासून राज्यातील प्राथमिक माध्यमिक, उच्च माध्यमिक आणि महाविद्यालये बंद होती. त्यापैकी नववीपासून महाविद्यालयीन शिक्षणापर्यंतचे शिक्षण ऑनलाईनऐवजी ऑफलाइन करावे असे शिक्षण खात्याने सूचल्याने. सध्या हे शिक्षण ऑनलाईन आणि ऑफलाईन या दोन्ही पद्धतीने सुरू आहे. आता नव्याने सुरू होणाऱ्या दुसऱ्या सत्रापासून पहिली ते आठवी पर्यंतचे वर्ग सुरू करण्याचा सल्ला दीर्घ चर्चेअंती तज्ज्ञ समितीने दिला आहे. यासाठी समितीने विविध प्रकारचे विचार विमर्श मुद्दे लक्षात घेऊन 23 सदस्यीय समितीने हा सल्ला दिला आहे . यावर कृतीदल चर्चा करून या आठवड्यात अंतिम निर्णय घेईल. सध्या अनेक शाळांना जागेचा प्रश्न असून कोरोना नियमानुसार शाळा सुरू करणे शक्य नाही त्यामुळे कोरोनाच्या संदर्भात आदर्श कार्य प्रणालीत (एसओपी) सुधारणा करणे गरजेचे असल्याचे शाळा प्रशासनाचे मत आहे.

सध्या ‘कोरोना’ लागण दर आणि मृत्यूदर दोन्ही ही नियंत्रणात आहेत. दुसरी लाट अद्यापही संपलेली नसली तरी सध्या ती पूर्णतः नियंत्रणात आहे. तिसरी लाट आलीच तर ती सौम्य असण्याची शक्यता वैद्यकीय क्षेत्रातील मान्यवर व्यक्त करत आहेत. त्यामुळे सर्व वर्ग सुरू करण्यात कोणतीच हरकत नाही.

- डॉ. शेखर साळकर, सदस्य - तज्ज्ञ समिती.

तज्ज्ञ समितीचा सकारात्मक सल्ला

•  पॉझिटिव्हिटी रेट 1 टक्क्यांपेक्षा कमी

•   मुलांमध्ये कोरोनाचे प्रमाण कमी, संसर्गाचा परिणाम नाही

•   नव्याने मुले रुग्णालयात भरती नाहीत

•   राज्यातील 70 टक्के मुलांमध्ये अँटीबॉडी तयार

•   शाळा सुरू करूनही प्रसार नाही