Goa Congress : इव्हेंट मॅनेजमेंटच्या नावाने सरकारकडून 7 कोटींचा घोटाळा!

Goa Congress : भाजपा सरकारने ‘इव्हेंट मॅनेजमेंट’च्या नावाने भ्रष्टाचार केला असून अलीकडे शिगमोत्सव, कार्निव्हल, फूड, हॅरिटेज, वाइन अशा विविध फेस्टिव्हलच्या माध्यमांतून या सरकारने तब्बल 7 कोटी रुपयांचा कथित घोटाळा केल्याचा आरोप काँग्रेस मीडिया विभागाचे अध्यक्ष अमरनाथ पणजीकर यांनी केला.

सरकार पर्यटन विभागाच्या माध्यमातून इव्हेंट आयोजित करून भ्रष्टाचार करीत आहे. पर्यटन विभागातील ‘केदार’ नामक व्यक्ती कथित सेंटिग करीत याच व्यक्तीकडून सत्ताधाऱ्यांमध्ये इव्हेंटच्या कमिशनचे पैसे (वाटा) पोचविले जाताहेत.

प्रत्येक सत्ताधाऱ्यांना या इव्हेंटची भागीदारी कमिशनच्या स्वरूपात भेटते, असा खळबळजनक आरोप करीत हा केदार नक्की कोण? असा सवाल करीत अमरनाथ पणजीकरांनी भाजपा सरकारवर सडकून टीका केली.

पणजीकरण म्हणाले, मुळात भाजपा सरकारकडून कर्ज काढून उत्सव साजरे केले जाताहेत. तिजोरीत खडखडाट असताना सरकार इव्हेंटच्या नावाने कमिशन गोळा करीत आहे. पर्यटन विभागाच्या माध्यमातून हे कथित घोटाळ्यांचे फेस्टिव्हल साजरे केले जाताहेत.

मुळात गोव्यात कार्यक्षम इव्हेंट मॅनेजमेंट करणारे अनेक गोमंतकीय आहेत, तरीही या कार्यक्रमांचे कंत्राट गोव्याबाहेरील लोकांनाच कसे मिळते? इव्हेंटच्या बोली प्रक्रियेवेळी सर्व सेंटिग करून महाराष्ट्रामधील कंपन्यांना ही कंत्राटे बहाल केली जाताहेत, कारण हे लोक सरकारला कमिशन देत असल्याचा आरोप त्यांनी केला.

सोमवारी म्हापशातील काँग्रेस कार्यालयात आयोजित पत्रकार परिषदेला सरचिटणीस विजय भिके व काँग्रेस नेते एल्विस गोम्स हे व्यासपीठावर हजर होते.

पूर्वी शिगमोत्सव व कार्निव्हल हे दोनच इव्हेंट साजरे व्हायचे. त्याच्या मागचा उद्देश हा गोव्याची संस्कृती व कलाकारांना प्रोत्साहन देण्यासोबत युवांमध्ये आवड निर्माण करायची होती. मात्र सध्या सरकारचा हेतू पूर्णतः बदलला असून इव्हेंटच्या नावे त्यांना पैसे कमवायचे आहे.

हा घोटाळा जवळपास 7 कोटी रुपयांचा असून याप्रश्नी मुख्यमंत्र्यांनी लक्ष घालावे व सरकारने याची चौकशी करावी. जर सरकार अपयशी ठरल्यास आम्ही दक्षता विभाग तसेच वेळ पडल्यास न्यायालयात जाऊ, असा इशारा अमरनाथ पणजीकर तसेच एल्विस गोम्स यांनी दिला.

पर्यटनमंत्री आता गप्प का?

मंत्री रोहन खंवटे हे विरोधात असताना समुद्रकिनारी स्वच्छतेमध्ये कोट्यवधींचा घोटाळा झाल्याचा आरोप करायचे. मात्र भाजपात गेल्यानंतर खंवटे याविषयी ब्र काढत नाहीत. त्यावेळी ते राजकीय आरोप करायचे की माजी पर्यटनमंत्री दिलीप परुळेकरांना ब्लॅकमिलिंग करायचे?

या किनारी स्वच्छतेमध्ये जर घोटाळा झालेला नसल्यास खंवटे यांनी स्पष्ट करावे, अन्यथा परुळेकरांची त्यांनी माफी मागावी, असे आव्हान पणजीकरांनी पर्यटनमंत्री खंवटे यांना केले.