Goa Police: दुचाकीवरून धोकादायक स्टंट करणाऱ्या तरूणाला अटक

Goa Police: दुचाकीवरून स्टंट करणाऱ्या एका तरूणाला गोव्यातील वेर्णा येथे पोलिसांनी अटक केली आहे. त्याने वाहतुकीच्या विविध नियमांचा भंग केला होता. त्यावरून त्याच्यावर गुन्हा दाखल करण्यात आला आहे.

मुख्तार रत्ती (वय 22) असे या संशयित तरूणाचे नाव आहे. तो बेतोडा, पोंडा येथील रहिवासी आहे.

गोव्यातील रस्त्यांवर रात्री-अपरात्री दुचाकीवरून स्टंट करण्याचा प्रयत्न काही तरूणांकडून होत असतो. हे व्हिडिओज सोशल मीडियात शेअरही केले जातात. या व्हिडिओंमध्ये दिसते की, स्वतःच्या आणि इतरांच्या जीवाला धोका निर्माण होईल, अशा पद्धतीने यात वाहन चालवले जात असते.

हा तरूण देखील अशाच पद्धतीने दुचाकीवर स्टंट करत होता. त्याच्या दुचाकीवर नंबरप्लेट नव्हती. त्याने हेलमेट परिधान केले नव्हते. त्याच्या बाईकला आरसे नव्हते. धोकादायक स्टंट करत तो स्वतःसह दुसऱ्या वाहनधारांच्या तसेच पादचाऱ्यांचा जीवाला धोका निर्माण करत होता. त्यामुळे त्याच्यावर गुन्हा दाखल करण्यात आला आहे.

गोव्यात रस्ते अपघातांचे प्रमाण खूप आहे. त्यावर नियंत्रण ठेवण्याचे प्रयत्न वाहतूक पोलिसांकडून केले जात आहेत. त्याचाच एक भाग म्हणून अशा धोकादायक रायडर्सवर कारवाई केली जात आहे.