Dhempo Vishwa Gramshala Foundation: धेंपो विश्व ग्रामशाळा प्रतिष्ठानने घेतल्या दोन शाळा दत्तक

Dhempo Vishwa Gramshala Foundation: दत्तक घेतलेल्या शाळांमध्ये कासारपाल आणि साळ सरकारी हायस्कूलचा समावेश आहे. मुख्यमंत्री डॉ. प्रमोद सावंत आणि डिचोलीचे आमदार डॉ. चंद्रकांत शेट्ये तसेच उद्योजक आणि प्रतिष्ठानचे श्रीनिवास धेंपे यांच्या उपस्थितीत सोमवारी (ता.13) तसा सामंजस्य करार करण्यात आला आहे.

शिक्षण खात्याचे संचालक शैलेश झिंगडे आणि प्रतिष्ठानच्या कार्यक्रम संचालक व्हीक्टोरीया चौगुले यांनी या करारावर सही केली आहे.

मुख्यमंत्र्यांच्या शासकीय निवासस्थानी हा कार्यक्रम पार पडला. यावेळी शिक्षण खात्याचे साहाय्यक संचालक मेल्विन डिकॉस्ता, धेंपो विश्व ग्रामशाळेच्या कार्यक्रम व्यवस्थापक रूपाली देसाई, प्रतिनिधी समीर नानोडकर आणि कासारपाल हायस्कूलचे मुख्याध्यापक सतीश तळकर उपस्थित होते.

शाळा दत्तक घेण्याच्या या संकल्पनेबद्दल मुख्यमंत्री डॉ. सावंत यांनी धेंपो विश्व ग्रामशाळा प्रतिष्ठानचे अभिनंदन केले. विश्वस्त मंडळे किंवा कॉर्पोरेट आस्थापनांनी यासाठी पुढाकार घ्यावा, असे आवाहनही त्यांनी केले. डॉ. चंद्रकांत शेट्ये यांनीही या संकल्पनेचे कौतुक करताना प्रतिष्ठानला धन्यवाद दिले.

तीन वर्षांसाठी शाळा दत्तक

धेंपो विश्व ग्रामशाळा प्रतिष्ठानतर्फे कासारपाल सरकारी हायस्कूल आणि साळ सरकारी हायस्कूल या शाळा आगामी तीन वर्षांसाठी दत्तक घेतल्या आहेत. या दत्तक योजनेंतर्गत या शाळांना आवश्यक साधनसुविधा उपलब्ध करून देतानाच, विद्यार्थ्यांना मूल्यवर्धित शिक्षण देण्यावर भर देण्यात येणार आहे.