Mumbai-Goa Highway: मुंबई-गोवा हायवेवर दुसरा भीषण अपघात, 2 ठार तर 10 जण गंभीर

पुण्याहून गोव्याकडे जाणाऱ्या लक्झरी बसला मुंबई गोवा महामार्गावरील कणकवली नजीक हळवल फाटा येथे भीषण अपघात झाला. या अपघातात दोन ठार झाले असल्याची माहिती समोर आली आहे. Accident on Mumbai-Goa Highway

या अपघातात अन्य 30 प्रवासी जखमी झाले असून दहा जणांची प्रकृती गंभीर आहे. जखमींवर कणकवली येथील उपजिल्हा रुग्णालय व खाजगी दवाखान्यात उपचार सुरू आहेत.

या अपघातात मृत झालेल्यांची ओळख पटली असून शैलजा प्रेमानंद माजी (वय- 56. रा. दोडामार्ग) व अण्णा गोविंद नाले (वय-52, रा. सातारा) अशी मृतांची नावे असल्याची माहिती पोलीस सूत्रानी दिली.

पुण्याहून गोव्याकडे जाणारी सदरची लक्झरी गुरुवारी पहाटे 5:30 वाजण्याच्या सुमारास हळवल फाटा येथे आली असता चालकाचा ताबा सुटून लक्झरी पलटी झाली.

अपघाताची खबर मिळताच स्थानिक नागरिक तसेच उपविभागीय पोलीस अधिकारी विनोद कांबळे, पोलीस निरीक्षक अनिल जाधव, पोलीस उपनिरीक्षक श्रीमती बर्गे, पोलीस उपनिरीक्षक श्री पाटील, किरण मेथे तसेच पोलीस कर्मचाऱ्यांनी तातडीने घटनास्थळी धाव घेतली.

जखमींना लागलीच कणकवली उपजिल्हा रुग्णालयात दाखल करण्यात आले. उपजिल्हा रुग्णालयात त्यांच्यावर तातडीने उपचारही सुरू करण्यात आले असून त्यातील दहा जणांची प्रकृती गंभीर असल्याचे पोलिसांनी सांगितले.

मुंबई गोवा महामार्गावर कणकवली शहरानजीक असलेल्या हळवल फाटा येथे तीव्र वळण आहे. या वळणावर यापूर्वी सातत्याने अपघात झाले आहेत. कणकवली शहरातील फ्लाय ओव्हर ब्रिज ज्या ठिकाणी संपतो त्या ठिकाणी गड नदीवरील पूलानंतर अचानक हे वळण समोर येते.

वेगात असलेले वाहन या ठिकाणी चालकाला आवरता येत नाही आणि अपघात घडतात. गेल्या काही महिन्यात सुमारे पाच ते सहा मोठी वाहने या ठिकाणी अपघातग्रस्त झाली आहेत. आतापर्यंत अनेक जणांना या ठिकाणी जीव गमवावा लागला आहे.