Dhargal Balrath Fire: धारगळमध्ये 'बालरथ'ला अचानक लागली आग

Balrath Caught Fire in Dhargal: गोव्यात विद्यार्थी वाहतूक करणाऱ्या एका बालरथ गाडीला आग लागल्याची घटना घडली आहे. उत्तर गोव्यातील पेडणे तालुक्यातील धारगळ येथे सोमवारी दुपारी ही घटना घडली.

धारगळ येथील रेडेकर हॉस्पिटलजवळ एका गॅरेजमध्ये वेल्डिंगचे काम सुरू होते. तिथेच हा बालरथ उभा होता. वेल्डिंगच्या ठिणग्यांमुळेच ही आग लागल्याचा संशय आहे. बालरथाने पेट घेतल्यानंतर त्याची तीव्रता पाहून परिसरात भीती निर्माण झाली होती.

आजुबाजूच्यांनी ही आग विझवण्याचा प्रयत्न केला मात्र काही वेळातच बालरथाला लागलेल्या आगीने मोठे रूप धारण केले. काळ्या धुराचे मोठे लोट आकाशात उठत होते. त्यानंतर अग्निशमन दलाला पाचारण करण्यात आले.

अग्निशमन दलाने तातडीने घटनास्थळी धाव घेतली. जवानांनी आग विझवेपर्यंत बालरथ पुर्णतः खाक झाला होता. मुख्य रस्त्याच्या कडेलाच ही घटना घडल्याने येथे बघ्यांची, वाहनधारकांची गर्दी झाली होती. या प्रकरणाची चौकशी करण्यात येणार असल्याचे समजते.

दरम्यान, या घटनेत कुणीही जखमी झालेले नाही.