Bank Robbery : केरी बँक दरोडा प्रकरणातील तिघांना शिताफीने पकडले

वाहन क्रमांकावरून लागला सुगावा; चोरीचे सोने, रोख रक्कम जप्त
Bank Robbery Accused
Bank Robbery Accused Dainik Gomantak

पणजी : केरी-सत्तरी येथील स्टेट बँक ऑफ इंडिया शाखेच्या व्यवस्थापकाचे अपहरण करून व पिस्तुलाचा धाक दाखवून बँक लुटलेल्या टोळीतील पाचपैकी तिघांना आज गोवा पोलिसांनी संयुक्तपणे केलेल्या कारवाईत शिताफीने अटक केली. त्यांच्याकडून 5.50 लाख रक्कम तसेच 1 किलो 100 ग्रॅम सोने पूर्णपणे जप्त करण्यात पोलिसांना यश आले आहे. या टोळीतील दोघे अजून फरारी असून लवकरच त्यांना गजाआड केले जाईल.

Bank Robbery Accused
Dinesh Gundu Rao : फुटीर आमदारांना प्रत्येकी 40 कोटी!

दरोडेखोरांनी बँक लुटण्यासाठी वापरण्यात आलेली व्हॅगनर गाडी (जीए 01 आर 7724), बँक व्यवस्थापकाला धमकावण्यासाठी वापरलेली एअर गन (पिस्तुल) व चाकू तसेच चोरलेली 8.75 लाख रोख रक्कमेपैकी 5.50 लाख रुपयांची रक्कम व 50 लाखांचे 1.100 किलो संशयिताकडून जप्त करण्यात आले आहे.

या टोळीतील दोघांची माहिती मिळाली असून पोलिस त्यांचा शोध घेत आहेत. या दरोड्यातील ‘मास्टरमाईंड’ साहिल खान ऊर्फ इर्शाद पिर खान (32) याला काल रात्री अटक केल्यानंतर आज सकाळी जितेंदर कुमार (30) व राजू कुमार दास (24) याला अटक करण्यात आल्याची माहिती पोलिस महानिरीक्षक ओमविर सिंग बिष्णोई यांनी आज संध्याकाळी घेतलेल्या पत्रकार परिषदेत दिली.

संशयित साहिल खान हा केरी येथे राहत असून तो टॅक्सी व्यवसाय करतो. तर गोवा वेल्हा येथील संशयित जितेंदर कुमार हा लाद्या बसवण्याचे काम करतो तर संशयित राजू कुमार हा गवंडी म्हणून काम करतो. हे दोघेही मजुराचे काम करत असल्याने साहिल याची त्यांच्याशी ओळख झाली होती. सध्या फरारी असलेल्या त्या दोघांसह साहिल याने या बँकेवर दरोडा घालण्याचा पूर्वनियोजन केले होते. त्यासाठी या चारजणांची मदत घेतली होती. पैशांच्या हव्यासापोटी त्यांनी बँक लुटली.

रेल्वे पोलिसांची सतर्कता

बँकेवर दरोडा घातल्यानंतर टोळीतील संशयित राजू कुमार दास याने वास्को-पाटणा एक्सप्रेस रेल्वेमधून पलायन करताना रेल्वे पोलिसांनी त्याला रत्नागिरी येथे ताब्यात घेतले. त्याला मडगाव येथे आज आणण्यात आले. त्याच्याजवळ 1 लाख 20 हजाराची रोकड सापडली. त्याने या दरोड्यातील इतर चारजणांची नावे उघड केली. त्यानुसार डिचोली पोलिसांनी संशयित साहिल ऊर्फ इर्शाद खान व जितेंदर कुमार याना अटक केली.

दरोड्यापूर्वी केली रेकी

केरी येथील मास्टरमाईंड साहिल ऊर्फ इर्शाद खान याने बँकेच्या व्यवस्थापकाबद्दल माहिती जमविली. त्यानुसार नियोजन करत काही मजुरांना हाताशी घेतले. त्याने व्यवस्थापकाचा नेहमी बँकेतून जाणाऱ्या रस्त्याचा अभ्यास केला होता. या बँकेच्या चाव्या कोणाकडे असतात त्याची माहिती मिळवली. मात्र, दरोड्यासाठी वापरलेल्या गाडीचा क्रमांक न बदलता तोच ठेवल्याने पोलिसांना सुगावा मिळाला.

सुरक्षारक्षक ठेवण्याचे आवाहन : राज्यातील बहुतेक बँकांमध्ये रात्रीच्यावेळी सुरक्षारक्षक नसतो. काही बँकांतील सीसीटीव्ही बंद अथवा नादुरुस्त आहेत. नियमानुसार सुरक्षारक्षक माजी सैनिक किंवा प्रशिक्षित असावा.मात्र, पैसे वाचविण्यासाठी बँका सुरक्षारक्षक ठेवत नाहीत. त्यामुळे बँकांनी सुरक्षारक्षक ठेवण्याचे आवाहन पोलिसांनी केले आहे.

Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.

दैनिक गोमन्तक आता सर्व सोशल मीडिया प्लॅटफॉर्मवर. ताज्या घडामोडींसाठी फेसबुक, इन्स्टाग्राम, ट्विटर, शेअर चॅट आणि टेलिग्राम आम्हाला फॉलो करा. तसेच, दैनिक गोमन्तकच्या यूट्यूब चॅनेलला आजच सबस्क्राइब करा.

Related Stories

No stories found.
Dainik Gomantak | दैनिक गोमन्तक
www.dainikgomantak.com