Goa BJP : लोकसभा निवडणुकीमध्ये भाजप दोन्ही जागा जिंकणार

Goa BJP : गोव्यातील लोकांचा विश्वास, हीच भाजपची खरी शिदोरी आहे. आम्ही लोकांना गृहीत धरत नाही. त्यांचा पक्षाप्रती विश्र्वास वाढविण्यास आम्ही प्रयत्नशील आहोत. लोकसभा निवडणुकीला पावणे दोन वर्षे बाकी आहेत. पण आम्ही लोकसभेच्या दोन्ही जागा जिंकू, असे भाजप प्रदेशाध्यक्ष सदानंद शेट तानावडे यांनी मडगावात पत्रकारांशी संवाद साधताना सांगितले.

लोकसभेसाठी आमची तयारी सुरू झाली असून पक्षांतर्गत संघटनांनी मोर्चेबांधणी केली आहे. लोकसभेसाठी भाजपचे कोण उमेदवार हे अद्याप निश्‍चित केलेले नाही, असेही तानावडे यांनी सांगितले.

कॉंग्रेसचे आठ आमदार भाजपमध्ये प्रवेश करू इच्छितात, यावर तानावडे म्हणाले, की कॉंग्रेसच्या एकाही आमदाराने आमच्याशी संपर्क साधलेला नाही. आम्ही काँग्रेस आमदारांच्या पक्षबदलाच्या बातम्या केवळ प्रसिद्धी माध्यमांतूनच ऐकत आहोत.

नगरसेवक प्रवेश, हे स्थानिक राजकारण

पुढील विधानसभा निवडणुकीत मडगावात भाजपचाच उमेदवार निवडून येईल. त्यासाठी आम्ही मडगाव मंडळाची मजबूत बांधणी करणार असून कार्यकर्त्यांचा विश्र्वास मिळविण्याचा आमचा प्रयत्न असेल. मडगावचे चार नगरसेवक भाजपमध्ये प्रवेश करणार असल्याविषयी तानावडे म्हणाले, की त्यांच्या प्रवेशाबद्दल कोणतीही चर्चा झालेली नाही. हे स्थानिक राजकारण आहे. यात आम्ही खोलात जात नाही.