Panaji Municipal Corporation: पणजी महानगरपालिकेचे अंदाजपत्रक आज

Panaji Municipal Corporation: महापालिकेचे 2023-24 चे अंदाजपत्रक सोमवार, 27 रोजी दुपारी 3.30 वाजता महापौर रोहित मोन्सेरात हे मांडणार आहेत.

परंतु विशेष बैठक बोलावून हे अंदाजपत्रक मांडले जात असल्याने अनेकांना त्याचे अवलोकन करण्यास वेळ मिळालेला नाही. त्यामुळे अनेक नगरसेवक या बैठकीला दांडी मारण्याच्या तयारीत आहेत.

अंदाजपत्रक सादरीकरणासाठी विशेष बैठक बोलाविता येत नाही, असे नगरसेवकांचे म्हणणे आहे. त्यासाठी किमान सात दिवस अगोदर नगरसेवकांना या बैठकीची माहिती देणे आवश्‍यक असते.

परंतु तसे न करता तीन दिवस राहिले असतानाच अंदाजपत्रक सादरीकरण होणार असल्याचे जाहीर केले.

त्यामुळे माजी महापौर सुरेंद्र फुर्तादो यांनी नाराजी व्यक्त करत त्याविषयीचा एक संदेश आयुक्तांना पाठविला होता. त्याशिवाय उदय मडकईकर, ज्योएल आंद्रादे यांनीही अशा विशेष बैठकीविषयी नाराजी व्यक्त केली आहे.