Bus Accident: कमानपाटा तुटून बस उलटली शेतात

Bus Accident: भिंडे-बेतोडा येथे काल झालेल्या अपघातात प्रवासी बसचा कमानपाटा तुटल्याने ती रस्त्यावरून घसरून लगतच्या शेतात उलटली. या दुर्घटनेत 30 प्रवासी जखमी झाले. जखमींमध्ये बसचालकासह 14 विद्यार्थी, काही वयोवृद्ध लोक आणि प्रवाशांचा समावेश होता.

यापैकी 19 प्रवाशांना उपचारानंतर डिस्चार्ज दिला. पाचजण आयडी इस्पितळात, तर तिघे गोमेकॉत उपचार घेत आहेत.

मिळालेल्या माहितीनुसार, सकाळी 7-30 च्या सुमारास निरंकाल-बेतोडा रस्त्यावर भिंडे येथे पंचायत कार्यालयाजवळ वेलांकनी नावाची खासगी प्रवासी बस सुमारे 30 प्रवासी, 1वाहक आणि चालकासह फोंड्याच्या दिशेने निघाली होती.

भिंडे येथील साकव ओलांडताना बसच्या पुढील चाकावरील कमानपाटा तुटला. त्यामुळे चालकाचे नियंत्रण सुटून बस रस्त्याच्या कडेला शेतात कोसळली. मोठा आवाज झाल्यामुळे त्वरित लोकांनी घटनास्थळी धाव घेतली आणि बसमधील प्रवाशांना सुरक्षित बाहेर काढले.

त्यांना उपजिल्हा रुग्णालयात उपचारासाठी दाखल केले. स्थानिक आमदार तथा जलस्रोत खात्याचे मंत्री सुभाष शिरोडकर यांनी अपघाताची माहिती मिळताच घटनास्थळी धाव घेतली.

तसेच फोंडा उपजिल्हा हॉस्पिटलमध्ये जखमी प्रवाशांची विचारपूस केली. शक्य त्यांना यावेळी मदतही करण्यात आली.

ज्या ठिकाणी अपघात घडला, तेथे रस्ता अरुंद आहे. या ठिकाणी संरक्षक भिंत उभारावी, अशी स्थानिकांची मागणी असून ती लवकरच उभारण्यात येईल. काळजीपूर्वक वाहन चालवण्याची आवश्यकता आहे. या अपघाताची पोलिसांकडून चौकशी करण्यात येत आहे. - सुभाष शिरोडकर, जलस्रोत मंत्री.