Bicholim: डिचोलीत 2 पंचायतीतील दोन जागांसाठी पोटनिवडणूक; 6 उमेदवार रिंगणात

Bicholim ByPoll: डिचोली तालुक्यातील 2 पंचायतींच्या मिळून दोन प्रभागांसाठी होणाऱ्या पोटनिवडणुकीसाठी प्रत्येकी तीन मिळून सहा उमेदवार रिंगणात आहेत. येत्या 25 मार्च रोजी ही पोटनिवडणूक होणार आहे.

आज (गुरुवारी) अर्ज मागे घेण्याच्या मुदतीत वेळगे पंचायतीतून एका उमेदवाराने उमेदवारी अर्ज मागे घेतला.

डिचोलीचे मामलेदार आणि निवडणूक अधिकारी राजाराम परब यांनी ही माहिती दिली. दरम्यान, निवडणूक रिंगणातील उमेदवारांना गुरुवारी दुपारीच निवडणूक चिन्हांचे वाटप करण्यात आले. खर्च मर्यादा तसेच निवडणुकीसंदर्भात उमेदवारांना मार्गदर्शनही करण्यात आले.

दोन प्रभागांसाठी पोटनिवडणूक

गेल्यावर्षी झालेल्या पंचायत निवडणुकीत वन-म्हावळींगे पंचायतीच्या प्रभाग-6 मधून निवडून आलेले पंचसदस्य भागो वरक यांचे निधन झाल्याने या प्रभागासाठी पोटनिवडणूक होत आहे.

राज्यात निवडून आलेल्या पंचसदस्यांपैकी स्व. भागो वरक सर्वात वयस्कर पंचसदस्य होते. तर वेळगे पंचायतीच्या प्रभाग-5 चे पंच सदस्य दुर्गादास नाईक यांनी राजीनामा दिल्याने या प्रभागासाठी पोटनिवडणूक होत आहे.

अंतिम उमेदवार

पोटनिवडणुकीसाठी पंचायतवार रिंगणातील उमेदवार पुढीलप्रमाणे-

वन-म्हावळींगे पंचायत- शाहू बोमो वरक, एकनाथ सदानंद च्यारी आणि राजेंद्र वसंत नार्वेकर.

वेळगे पंचायत- सर्वेश नवसो घाडी, साक्षी सुदेश प्रियोळकर आणि महेश मधुकर गवंडे.