Ponda News : फोंडा नगरपालिका नूतन मंडळासमोर आव्हानांचा डोंगर

मिलिंद म्हाडगुत

फोंडा : फोंडा नगरपालिकेत रितेश नाईक यांची परत एकदा नगराध्यक्षपदी वर्णी लागली. त्यांच्यासमोर विकास कामांच्या आव्हानांचा डोंगर आहे. त्यात सुवर्ण महोत्सवी प्रकल्प, बाजार प्रकल्पांबरोबर मास्टर प्लॅनसारखे मोठे प्रकल्प गतीने राबविणे गरजेचे आहे, असे मत फोंडावासियांचे आहे.

दिपा कोलवेकर यांची उपनगराध्यक्ष म्हणून झालेली निवड मात्र थोडीशी अचंबित करणारी होती. या जागी नुकत्याच भाजपमध्ये प्रवेश केलेल्या व बिनविरोध निवडून आलेल्या प्रभाग क्रमांक १३ च्या नगरसेविका विद्या पुनाळेकर यांची उपनगराध्यक्षपदी वर्णी लागेल, अशी सर्वसाधारण अपेक्षा होती. पण दिपा या माजी नगराध्यक्ष शांताराम कोलवेकर यांच्या पत्नी असल्यामुळे त्यांना प्राधान्य मिळाले असण्याची शक्यता व्यक्त होत आहे.

आता पालिकेत भाजपप्रणित मंडळ आले असून मतदारसंघाचा आमदार हा सरकारात मंत्री आहे. त्यामुळे यावेळी विकासाची गंगा शहरात येऊ शकते, अशी अपेक्षा केली जात आहे. तशी नूतन मंडळासमोर अनेक आव्हाने उभी आहेत. सुवर्ण महोत्सवी प्रकल्प, बाजार प्रकल्पाचा पडीक राहिलेला भाग कार्यान्वित करणे, मास्टर प्लॅन चालीस लावणे, प्रभागात गरजेप्रमाणे सुधारणा करणे, मासळी बाजाराचे नूतनीकरण,

फिरत्या विक्रेत्यांना जागा आखून देणे, पालिकेच्या नवीन इमारतीचे कार्य पूर्णत्वास नेणे, पालिका उद्यानाचे सौंदर्यीकरण करणे, दादा वैद्य चौकात सिग्नल्स घालणे, इत्यादी अनेक कार्ये या मंडळास तडीस न्यावी लागणार आहे. त्याशिवाय प्रत्येक प्रभागात जी काही आवश्यक कामे आहेत. ही सर्व कामे पूर्णत्वास न्यावी लागणार आहे.

दळवी ‘वेट अँड वॉच' भूमिकेत : माजी नगराध्यक्ष विश्वनाथ दळवी हे फोंडा भाजपचे गटाध्यक्ष म्हणून कार्यरत आहे. यावेळी बिनविरोध निवडून आल्यामुळे तसेच हॅट्रिक साधल्यामुळे त्यांचे ‘वजन’ वाढले होते. त्याचा फायदा त्यांना नगराध्यक्ष बनण्यात होईल, असे त्यांच्या कार्यकर्त्यांना वाटत होते. पण ज्याच्या हातात ‘ससा तोच पारधी’ हेच राजकारणाचे तत्त्व असल्यामुळे दळवींना नगराध्यक्षपदापासून दूर राहावे लागले. त्यामुळे सध्या ते ''वेट अँड वॉच''च्या भूमिकेत दिसतात.

संगीत खुर्चीचा खेळ?

गेल्यावेळी गाजलेला संगीत खुर्चीचा खेळ, या वेळेला संपतो की काय? हे बघावे लागेल. २०१३ ते २०१८ या पाच वर्षाच्या काळात राधिका नायक याच फोंडा पालिकेच्या एकमेव नगराध्यक्ष होत्या. त्याची पुनरावृत्ती होवो, अशी अपेक्षा व्यक्त होत असली तरी राजकारणात काही होऊ शकते हेही तेवढेच खरे आहे. तरीसुद्धा पुढील विधानसभा निवडणुकीपर्यंत म्हणजे २०२७ पर्यंत तरी नगराध्यक्ष बदल होणार नाही, असा अंदाज वर्तविला जात आहे.

प्रभाग दहावर जास्त लक्ष

प्रभाग क्रमांक दहा हा सर्वात महत्त्वाचा प्रभाग. यात फोंड्याचा बाजार हा भाग येत असल्यामुळे या प्रभागाला अतिशय महत्त्व प्राप्त झाले आहे. पण या भागातील महत्त्वाच्या बाजार प्रकल्पाचा वरचा भाग अजूनही कार्यान्वित झालेला नाही. काही दुकाने भाडे पट्टीवर दिलेली असली तरी तिथे वीज नसल्यामुळे ती बंदच आहेत. त्यामुळे हा भाग एकदम पडीक झाल्यासारखा वाटतो आहे.

आता विजेचा ट्रान्सफॉर्मर कार्यान्वित होणार असल्यामुळे इथे बंद असलेली दुकाने भाडेपट्टीवर दिली जाऊ शकतात . त्यातून पालिकेलाही आर्थिक स्रोत निर्माण होऊ शकतो. या प्रभाग दहाच्या नगरसेविका दीपा कोलवेकर या आता उपनगराध्यक्ष झाल्यामुळे या प्रभागाच्या विकासावर त्या लक्ष केंद्रित करतील अशी अपेक्षा केली जात आहे.