चेन्नई पर्यटक हत्येप्रकरणी दोघांची निर्दोष मुक्तता

मडगाव : मूळ चेन्नई येथील मदन जे या 29 वर्षीय पर्यटकाचा कोलवा येथे खून केल्याचा आरोप असलेल्या दोन बाऊन्सर्सची दक्षिण गोव्याचे प्रधान सत्र न्यायाधीश इर्षाद आगा यांनी निर्दोष मुक्तता केली. निर्दोष मुक्त केलेल्या बाऊन्सर्सची नावे बासिलो राताव उर्फ पोकोड आणि झेव्हीयर डिसोझा अशी असून 13 जानेवारी 2013 रोजी रात्री त्यांनी कोलवा येथील एका हॉटेलवर आलेल्या पर्यटकांना मारहाण केल्याने त्यातून ही हत्या झाल्याचा त्यांच्यावर आरोप होता.

न्यायालयात त्यांची बाजू ऍड. बायरन रोड्रीग्स व एड. रवी कोलवाळकर यांनी मांडली.
या प्रकरणी गोपीनाथ ए. या पर्यटकाने कोलवा पोलिसांत तक्रार दिली होती. चेन्नईहुन गोव्यात आलेला युवा पर्यटकांचा एक गट कोलवा येथील हॉटेल बुमरंग येथे आला असता दिलेली ऑर्डर येण्यास उशिर केल्याने त्यांनी व्हेटरकडे हुज्जत घालण्यास सुरवात केली.

यावेळी तिथे बाऊन्सर्स म्हणून काम करणाऱ्या वरील दोघांनी त्यांना ओढत कोलवा समुद्र किनाऱ्यावर आणून त्यांना मारहाण करण्यास सुरुवात केली. त्यापैकी मदन या पर्यटकाच्या पोटात पोकोड याने सुरा खुपसल्याने रक्तस्राव होऊन त्याचे निधन झाले असा त्यांच्यावर आरोप ठेवण्यात आला होता. या खटल्यात सरकार पक्षातर्फे 14 साक्षीदार पेश करण्यात आले मात्र संशयितावरील गुन्हे सिद्ध होण्याइतपत पुरावे समोर येऊ न शकल्याने दोघांनाही निर्दोष मुक्त करण्यात आले.