Sulakshana Sawant: इंधन दरवाढीवर मुख्यमंत्र्यांच्या पत्नीने काँग्रेसला दिला 'हा' सल्ला

Sulakshana Sawant: घरगुती गॅस सिलिंडरच्या दरात 50 रूपये तर व्यावसायिक गॅस सिलिंडदरच्या दरात 250 रूपये वाढ या महिन्याच्या सुरवातीलाच झाली होती. तेव्हापासून आधीच महागाईचे चटके बसत असलेल्या सर्वसामान्यांमधून चिंता व्यक्त होत आहेत.

यामुळे गृहिणींचे बजेटही बिघडले आहे. याच विषयावर आता गोव्याचे मुख्यमंत्री डॉ. प्रमोद सावंत यांच्या पत्नीचीही प्रतिक्रिया समोर आली आहे.

मुख्यमंत्री सावंत यांच्या पत्नी सुलक्षणा सावंत म्हणाल्या की, इंधन दरवाढ हा जागतिक विषय आहे. तो कुठल्याही पक्षाच्या हातात असलेला विषय नाही. भारताला पेट्रोलियम उत्पादने इतर देशांतून आयात करावी लागतात आणि देशांतर्गत पेट्रोल-डीझेलचे दर आंतरराष्ट्रीय दरांनुसार ठरतात.

आंतरराष्ट्रीय दरानुसारच भारतातही दरवाढ होत असते. त्यानुसार गोव्यातही गॅस सिलिंडरच्या दरात वाढ करण्यात आली आहे, त्याला काहीही करता येत नाही इंधन दरवाढीविरोधात आंदोलन करण्यास काँग्रेसला कुणी रोखलेले नाही, असेही त्यांनी म्हटले आहे.

दरम्यान, आंतरराष्ट्रीय बाजारात कच्चा तेलाच्या दरांवरून पेट्रोल-डीझेल किंवा इतर पेट्रोलियम उत्पादनांचे दर ठऱत असतात. जगातील ठराविक देश सोडल्यास खनिच तेल किंवा नैसर्गिक वायूचे साठे आखाती देशांमध्ये मोठ्या प्रमाणात आढळतात.

त्यामुळे या पेट्रोलियम उत्पादनांच्या पुरवठ्यासाठी या देशांकडून होत असलेल्या आयातीवर जगभरातील अनेक देश अवलंबून असतात. साहिजकच देशांच्या अर्थव्यवस्थांवर त्याचा मोठा प्रभाव पडत असतो.

आणि सरतेशेवटी इंधन दरात वाढ झाली की आपुसकच त्याचा परिणाम इतर वस्तुंच्याही दरवाढीत होतो आणि महागाईचा चटका बसत असतो.