Cold Wave in Goa : राज्यात तापमानाचा पारा घसरला, थंडी वाढली

राज्यात पुन्हा थंडीला सुरुवात झाली आहे. हळूहळू गारवा वाढू लागला आहे. गेले कित्येक दिवस राज्यातील उष्मा वाढला होता, मात्र आता पुन्हा थंडीची हुडहुडी राज्यभर वाढणार असल्याची शक्यता गोवा वेधशाळेद्वारे वर्तविण्यात आली आहे. राज्यातील किमान तापमान 20 अंशांवरुन ते 18.5 अंशावर पोहोचले आहे.

येत्या दिवसात अजून 1 ते 2 अंशांनी किमान तापमानात घट होणार असल्याने राज्यात कडाक्याची थंडी नागरिकांना अनुभवता येणार आहे. वैज्ञानिक एम. राहुल म्हणाले, कालच्या तुलनेत किमान तापमानात 2 अंशांनी घट झाली आहे. येत्या 48 तासांत पुन्हा 1 ते 2 अंश सेल्सिअस घट होणार आहे.

सर्दी खोकल्याच्या रुग्णांत वाढ

हवामान बदलांमुळे मोठ्या प्रमाणात नागरिक आजारी पडत आहेत. सर्दी, खोकला, पडसे आदींच्या रुग्णांमध्ये वाढ झाली आहे. त्यामुळे नागरिकांनी योग्य ती काळजी घेण्याचा सल्ला डॉक्टर देत आहेत. गरम कपड्यांचा वापर करणे, तेलकट पदार्थ टाळणे, गरम पाणी पिणे, संतुलित आहार करण्याचा सल्ला देण्यात येत आहेत.