पिसुर्ले : सरकारने ‘डिजिटल इंडिया ’चा नारा दिला असून जनतेच्या सोयीसाठी विविध योजना ऑनलाईन करण्याचा चंग बांधला आहे. परंतु सदर योजनेच्या त्यासाठी लागणाऱ्या साधन सुविधा मात्र, उपलब्ध करून देत नसल्याने सर्व सामान्य जनतेला याचा लाभ होताना दिसत नाही.
याचे ज्वलंत उदाहरण म्हणजे होंडा पंचायत क्षेत्रातील तलाठी कार्यालयातील संगणक गेली आठ महिने नादुरुस्त आहेत. नवीन संगणक देण्यात आलेले नाहीत, त्यामुळे सर्वसामान्यांची कामे रखडली असून ग्रामस्थांना महत्वाची कामे उरकण्यासाठी खासगी एजन्सीकडे धाव घ्यावी लागत आहे.
होंडा पंचायत क्षेत्रातील जनतेची विविध कामे ऑनलाईन पद्धतीने मार्गी लावण्यासाठी सरकारने तलाठी कार्यालयात काही वर्षांपासून संगणक उपलब्ध केले होते. त्यामुळे या भागातील ग्रामस्थांना तलाठी कार्यालयातून मोफत विविध स्वरूपाचे दाखले उपलब्ध होत होते. यामुळे वेळ व पैसा याची बचत होऊन लोकांना याचा बराच फायदा होत होता.
परंतु गेल्या आठ महिन्यांपासून या कार्यालयातील संगणक यंत्रणा नादुरूस्त झाल्याने येथील कार्यालयातून कोणतेही दाखले किंवा इतर सुविधा उपलब्ध होत नाहीत. या भागातील ग्रामस्थांना आर्थिक भुर्दंड सोसून खाजगी संस्थेकडून कामे करण्यासाठी धावपळ करावी लागत आहे. तलाठ्यांना कार्यालयीन कामसाठी आठवड्यातून एकदा वाळपई मामलेदार कार्यालयात जावे लागत आहे.
अहवाल वरिष्ठांकडे पण; कारवाईच नाही!
होंडा तलाठी कार्यालयातील संगणक यंत्रणा पंचायत निवडणूक झाल्यापासून नादुरूस्त झाली आहे, या विषयीचा अहवाल वरिष्ठांकडे पाठवण्यात आला असल्याची माहिती मिळाली आहे. मात्र अद्याप कोणतीही कारवाई झालेली नाही.या संबंधी पर्ये मतदार संघाच्या आमदार डॉ. दिव्या राणे यांनी लक्ष घालून येथे संगणकाची व्यवस्था उपलब्ध करून द्यावी, अशी मागणी होंडा भागातील रहिवाशांनी केली आहे.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
दैनिक गोमन्तक आता सर्व सोशल मीडिया प्लॅटफॉर्मवर. ताज्या घडामोडींसाठी फेसबुक, इन्स्टाग्राम, ट्विटर, शेअर चॅट आणि टेलिग्राम आम्हाला फॉलो करा. तसेच, दैनिक गोमन्तकच्या यूट्यूब चॅनेलला आजच सबस्क्राइब करा.
