Girish Chodankar: अनेक मंदिरात बहुजन समाजाला गाभाऱ्यात प्रवेश नसतो; मुख्यमंत्र्यांनी यात बदल करावा...

Girish Chodankar On CM Pramod Sawant: बहुजन समाजाला आजही राज्यातील मंदिरांच्या गाभाऱ्यात प्रवेश करण्यापासून वंचित ठेवले जाते, अशी खंत गोवा प्रदेश काँग्रेस समितीचे माजी अध्यक्ष गिरीश चोडणकर यांनी व्यक्त केली.

मुख्यमंत्री डॉ. प्रमोद सावंत यांनी सनातन धर्माच्या रक्षणासाठी कटिबद्ध असल्यास परिवर्तन घडवून आणण्याचे काम केले पाहिजे, असा टोलाही त्यांनी मुख्यमंत्र्यांना लगावला.

चोडणकर म्हणाले की, सनातन धर्मात बहुजन समाजाबाबत भेदभाव आहे. विविध जातींना सनातन धर्मात कमी लेखले जाते.

गोव्यात आपण पाहिले आहे की, ओबीसी, अनुसूचित जमाती, अनुसूचित जाती आणि इतरांचा समावेश असलेल्या बहुजन समाजाला मंदिरात प्रवेशापासून वंचित ठेवले जात आहे. बहुजन समाजाशी भेदभाव केला जात आहे. त्यांना परत कसे देवळात आणता येईल, हे पाहिले पाहिजे.

काँग्रेस सर्व धर्मांचा आदर करते. आता डॉ. सावंत यांनी सनातन धर्माच्या रक्षणासाठी कटिबद्ध असल्यास बहुजन समाजाला मंदिरात प्रवेश देण्याचे काम करावे, असे चोडणकर यांनी पत्रकारांनी विचारलेल्या प्रश्नावर सांगितले.

सनातन धर्माबाबत मुख्यमंत्र्यांनी नुकत्याच केलेल्या वक्तव्याचा संदर्भ देत चोडणकर म्हणाले की, सनातन धर्मात बदल घडवून आणण्याची गरज आहे.

गोव्यात धार्मिक द्वेष वाढवण्याचे काम भाजप सरकार आल्यानंतर सुरू झाले. भाजप आणि त्यांच्याशी संबंधित संघटनांनी विद्वेष वाढवण्याचे काम केले. गोव्यातील धार्मिक सलोखा खराब होणे याला मुख्यमंत्रीच जबाबदार आहेत.

राज्यातील कायदा आणि सुव्यवस्था बिघडण्यास राज्याचे मुख्यमंत्रीच कारणीभूत आहेत. त्यांनी सुरवातीला पोर्तुगीजांबाबतचे वक्तव्य केले. त्यानंतर आता देवळांबाबतचे वक्तव्य केले. राज्यातील धार्मिक, सामाजिक सलोख्याला नख लावण्याचे काम ते करत आहेत. याला सर्वस्वी मुख्यमंत्री आणि त्यांचा पक्ष जबाबदार आहे.