दिवाळीनिमित्त दिव्यांनी सजली फोंडा बाजारपेठ

फोंडा: फोंडा तालुक्यातील ग्रामीण भागात दिवाळी (Diwali) सणाच्या तयारीसाठी लोक आतापासूनच तयारीला लागले आहेत. ठिकठिकाणचे युवक नरकासुर प्रतिमा बनवण्यात गुंतले आहेत. फोंडा व इतर ग्रामीण भागांतील बाजारपेठेत दिवाळी सणाला लागणारे साहित्य दाखल झाले आहे.

फोंडा बाजारपेठेत (Market) रंगीबेरंगी आकाशकंदील तसेच चिकणमातीपासून तयार केलेल्या पणत्या दाखल झाल्या आहेत. गेल्या दोन वर्षांपासून कोरोना महामारी संपलेली नाही. मात्र, यंदा लोकांमध्ये दिवाळी सणाचा (Diwali Festival) उत्साह थोडा वाढलेला दिसत आहे. सध्या बाजारपेठेत आकाशकंदिलाबरोबर रंगीत पताका, हार, पूजा साहित्य, पोहे आदी उपलब्ध झाले आहेत. कागदापासून नरकासुराचे मुखवटे बनवण्याच्या तयारीला युवक लागले आहेत. काही युवकांनी लोखंडी किंवा पत्र्याच्या आकाशकंदिलाऐवजी बांबूपासून तयार केलेले आकाशकंदील वापरणार असल्याचे सांगितले.

स्वयंसाहाय्‍य गटांकडून खाद्यपदार्थ निर्मिती

गृहिणींकडून दिवाळी सणासाठी लागणारे विविध खाद्यपदार्थ आधीच तयार करून ठेवले जातात. त्यासाठी गृहिणी या कामात गुंतल्याचे चित्र घराघरांत पाहायला मिळते. काही स्वयंसाहाय्‍य महिला गट एकत्र येऊन दिवाळी सणासाठी लागणारे विविध प्रकारचे खाद्यपदार्थ बनवून ते विक्रीसाठी बाजारपेठेत सज्ज ठेवले आहेत. यंदा बाजारपेठेत गर्दी वाढण्याची शक्यता आहे. मात्र, बाजारपेठेत येणाऱ्या लोकांनी सरकारच्या नियमावलीचे पालन करणे गरजेचे आहे.