डिचोली : राज्‍यासह डिचोली तालुक्‍यातील बहुतेक सर्वच भागात खरीप भातपिकाचा मोसम आटोपला आहे. आता तालुक्‍यातील शेतकऱ्यांना वायंगण शेतीचे वेध लागले आहेत. पिळगाव आणि मये आदी काही भागात तर वायंगण शेतीसाठी मशागतीची कामे सुरू झाली आहेत.
तालुक्‍यातील अन्य भागांच्या तुलनेत पिळगाव भागात दरवर्षी एक महिना अगोदर वायंगण शेती लागवड करण्यात येते. पिळगावात दरवर्षी साधारण फेब्रुवारी महिन्यानंतर पाण्याची टंचाई निर्माण होत असल्याने या भागातील शेतकरी एक महिना अगोदरच वायंगण भातपिक घेतात. या भागातील शेतकऱ्यांनी खरीप पिक घेतले असून, सध्या बळीराजा वायंगण शेतीच्या कामाकडे वळला आहे. शेतजमीन नांगरणीचे काम सुरूही झाले आहे. चालू महिन्याच्या अखेरपर्यंत पिळगाव भागातील शेतकरी वायंगण शेती लागवडीच्या कामाकडे वळणार असल्याचे संकेत मिळाले आहेत. तर येत्या काही दिवसात अन्य भागात वायंगण शेती मशागतीच्या कामांना सुरवात होणार असल्याचे समजते.
महिन्यापूर्वी पावसाचा जोर कमी होताच, मये भागातील शेतकऱ्यांनीही वायंगण शेतजमिनीची मशागत करण्याचे काम हाती घेतले आहे. शेतकऱ्यांच्या अनास्थेमुळे तालुक्‍यातील मोजकेच गाव वगळता मये, पिळगाव, कुडचिरे, बोर्डे, कारापूर, मेणकुरे आदी बहुतेक गावात अजूनही वायंगण शेतीचे अस्तित्व टिकून आहे. तालुक्‍यात १२० हेक्‍टरहून अधिक शेतजमिनीत वायंगण भातशेतीची लागवड करण्यात येते.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
दैनिक गोमन्तक आता सर्व सोशल मीडिया प्लॅटफॉर्मवर. ताज्या घडामोडींसाठी फेसबुक, इन्स्टाग्राम, ट्विटर, शेअर चॅट आणि टेलिग्राम आम्हाला फॉलो करा. तसेच, दैनिक गोमन्तकच्या यूट्यूब चॅनेलला आजच सबस्क्राइब करा.