Goa Election: फडणवीसांपुढे उमेदवारी वाटपाचे आव्हान

देवेंद्र फडणवीस अनंत चतुर्दशीनंतर गोवा दौऱ्यावर
Goa Election: फडणवीसांपुढे उमेदवारी वाटपाचे आव्हान
Goa Election: Devendra FadnavisDainik Gomantak

पणजी: भाजपचे (BJP) नवे निवडणूक प्रभारी महाराष्ट्राचे माजी मुख्यमंत्री देवेंद्र फडणवीस (Devendra Fadnavis) अनंत चतुर्दशीनंतर गोव्याच्या (Goa) दौऱ्यावर येणार आहेत. एका मतदारसंघात भाजपच्या उमेदवारीसाठी अनेकजण इच्छुक असणे, ही सध्या पक्ष संघटनेसमोरील मोठी कटकट आहे. त्यामुळे फडणवीस यांच्या पहिल्याच दौऱ्यात या विषयाला हात घातला जाणार आहे.

फडणवीस हे पंतप्रधान नरेंद्र मोदी आणि केंद्रीय गृहमंत्री अमित शहा यांचे निकटवर्तीय नेते आहेत. यामुळे फडणवीस यांची नियुक्ती करून राज्यातील भाजपच्या राजकारणाची सारी सूत्रे अप्रत्यक्षपणे दिल्लीतील नेत्यांच्या ताब्यात सध्या गेलेली आहेत. गेल्या निवडणुकीवेळी दिल्लीतील नेत्यांनी काही विधानसभा मतदारसंघात उमेदवार बदलाची सूचना केली होती. मात्र, स्थानिक पातळीवर ठरवण्यात आलेला उमेदवार कायम राहावा, यासाठी आग्रह धरण्यात आला होता.

Goa Election: Devendra Fadnavis
Goa Election: BJP विरोधात आघाडीसाठी शिवसेनेचे जोरात प्रयत्‍न !

परिणामी केवळ 13 जागाच भाजपला जिंकता आल्या होत्या. मुख्यमंत्र्यांसह मंत्रिमंडळातील बहुतांश सहकारी त्यावेळी पराभूत झाले होते. या गोष्टीची पुनरावृत्ती होऊ नये यासाठी भावनेच्या आधारावर उमेदवारीचा निर्णय न करण्याचे भाजपने ठरवल्याची माहिती मिळाली आहे. यामुळे आजवर कोणीही आपली उमेदवारी परस्पर जाहीर करून टाकली असली तरी प्रत्यक्षात उमेदवारी जाहीर होईल, त्या वेळी नवा चेहरा समोर येण्याची शक्यता आहे. काही मतदारसंघांत धक्कादायकपणे संघटनेतील एखाद्या नावाची शिफारस होण्याची शक्यता नाकारता येत नाही.

भाजपने राष्ट्रीय पातळीवर आणि प्रदेश पातळीवर प्रत्येक मतदारसंघातील कमकुवत दुवे आणि बलस्थाने आणि संभाव्य उमेदवारी याबाबत सर्वेक्षण केले होते, तसेच त्याचा अहवाल तयार होत आलेला आहे. पहिल्या टप्प्यातील या अहवालावर सध्याचे कोणते आमदार निवडून येऊ शकतात आणि कोणत्या ठिकाणी थोडा भर दिला तर भाजपला विजय मिळू शकतो आणि कोणत्या ठिकाणी उमेदवार बदलण्याची खरीच गरज आहे, याविषयीची निश्‍चिती केली जाणार आहे. दर खेपेला विधानसभेमध्ये नवे चेहरे येण्याचे प्रमाण किती आहे त्यात भाजपचे किती नवे चेहरे असतात याचाही तौलनिक अभ्यास करण्यात आलेला आहे.

Goa Election: Devendra Fadnavis
Goa Election: उमेदवारी दिल्लीतूनच असे सांगत, बंडाळींवर भाजपचा तात्पुरता तोडगा

माहिती गोळा

फडणवीस यांनीही यापूर्वी गोव्यामध्ये राजकीय काम केले असल्याने आपल्या माहितगार सूत्रांकडून भाजपच्या एकंदर राजकीय परिस्थितीविषयी बरीच माहिती गेल्या आठवडाभरात गोळा केली आहे. या सगळ्या माहितीच्या आधारे भाजपच्या गाभा समितीची आणि प्रदेश कार्यकारिणीच्या प्रमुख सदस्यांची बैठक ते पणजीत घेतील.

"देवेंद्र फडणवीस यांनी‌ बिहारमध्ये उत्कृष्ट निवडणूक व्यवस्थापन केले आहे. यापुढे महत्त्वाच्या निर्णयात त्यांच्या मताला महत्त्व असेल."

- सदानंद शेट तानावडे, प्रदेशाध्यक्ष

Related Stories

No stories found.
Dainik Gomantak
www.dainikgomantak.com