मडगाव: मुख्यमंत्री डॉ. प्रमोद सावंत यांनी एका राजकारण्याच्या अध्यक्षतेखाली राज्यातील उच्च शिक्षण धोरण ठरविण्यासाठी तज्ज्ञांची समिती स्थापन केली आहे. या समितीचे कामकाज सुरू होण्यापूर्वी सरकारने प्राथमिक शिक्षणाचे माध्यम ठरविण्यासाठी स्थापन केलेल्या प्राचार्य भास्कर नायक समितीच्या अहवालावर आपले धोरण जाहीर करावे, अशी मागणी विरोधी पक्षनेते दिगंबर कामत यांनी केली आहे.
राज्यावर दूरगामी परिणाम करू शकणाऱ्या विविध विषयांवर धोरण निश्चित करताना या विषयांचा अभ्यास व अनुभव असलेल्या तज्ज्ञांच्या अध्यक्षतेखाली समिती स्थापन करणे महत्वाचे आहे, असे माझे ठाम मत असल्याचे कामत यांनी म्हटले आहे. प्राथमिक शिक्षण हेच विद्यार्थ्यांच्या भवितव्याची दिशा ठरवीत असल्याने, उच्च शिक्षणाविषयी धोरण ठरविण्याच्या अगोदर, प्राथमिक शिक्षणाच्या माध्यमावर सरकारने आपले मत जाहीर करणे गरजेचे आहे. गोवा सरकारने गोव्याच्या उज्वल भवितव्याचा विचार करून, पद्मविभूषण डॉ. रघुनाथ माशेलकर यांच्या अध्यक्षतेखाली विविध क्षेत्रातील मान्यवरांचा समावेश असलेल्या गोवा गोल्डन ज्युबली काऊंसिलने तयार केलेल्या व्हिजन-२०३५ अहवालाची ताबडतोब अंमलबजावणी करावी, अशी मागणी कामत यांनी परत एकदा मुख्यमंत्र्यांकडे केली आहे.
संपादन: ओंकार जोशी
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
दैनिक गोमन्तक आता सर्व सोशल मीडिया प्लॅटफॉर्मवर. ताज्या घडामोडींसाठी फेसबुक, इन्स्टाग्राम, ट्विटर, शेअर चॅट आणि टेलिग्राम आम्हाला फॉलो करा. तसेच, दैनिक गोमन्तकच्या यूट्यूब चॅनेलला आजच सबस्क्राइब करा.