गोव्यात कामगारांना कल्याणकारी सुविधांचा मिळणार लाभ; मुख्यमंत्र्यांच्या हस्ते ई-श्रम कार्डचे वाटप

कामगारांना सरकारी योजनांचा लाभ घेता यावा यासाठी केंद्र सरकारने ई-श्रम कार्ड सेवा सुविधा सुरू केली. शनिवारी साखळीतील रविंद्र भवनमध्ये कामगार आणि रोजगार आयुक्तांनी जारी केलेले ई-श्रम कार्ड मुख्यमंत्री प्रमोद सावंत यांच्या हस्ते असंघटित क्षेत्रातील 170 कामगारांना देण्यात आले.

यावेळी मुख्यमंत्री म्हणाले की, ज्या व्यक्तीकडे ई-श्रम कार्ड आहे ती व्यक्ती सर्व राज्य आणि केंद्र सरकारच्या योजनांच्या लाभासाठी पात्र ठरते. ई-श्रम कार्ड असलेल्या व्यक्तींना पहिल्या वर्षी, त्यांना भारत सरकारकडून मोफत विमा मिळेल. हा विमा कोणत्याही अनुचित घटना घडल्यास कुटुंबासाठी लागू होणार आहे. 2 लाख रुपयांच्या विम्यासाठीचा पहिला हप्ता सरकार भरणार आहे.

बांधकाम क्षेत्रात रोजंदारीवर काम करणाऱ्यांनी राज्य बांधकाम कल्याण मंडळाकडून जारी केलेल्या कार्डचा लाभ घेण्याचे आवाहनही मुख्यमंत्र्यांनी केले.

पहिल्यांदाच केंद्र सरकारने ही ई-श्रम कार्ड सुरू केली आहेत आणि ज्यांनी या सुविधेचा लाभ घेतला आहे त्यांचे मी अभिनंदन करतो. जे असंघटित क्षेत्रात काम करत आहेत म्हणजेच एकतर कारखान्यात किंवा काही घरी, अशांसाठी ई-श्रम कार्ड त्यांना सुरक्षा मिळावी यासाठी सुरू करण्यात आले आहे. हे कार्ड सर्व कामगारांना मोफत दिले जात असल्याचे मुख्यमंत्र्यांनी सांगितले.

हे कार्ड प्राप्त करण्यासाठी कामगारांना कामगार आणि रोजगार आयुक्तांकडे एक फॉर्म भरावा लागेल, ज्यामध्ये त्यांच्या कामाच्या ठिकाणाचा उल्लेख करावा लागेल आणि त्यांची ओळख आणि राहण्याचा पुरावा द्यावा लागेल. यानंतर संबंधित व्यक्तीचे कामगार विभागातर्फे आठ दिवसांत ई-श्रम कार्ड तयार करण्यात येते.

जर कामगाराचे वय 18 ते 40 वर्षांच्या दरम्यान असेल, तर तो पेन्शन मिळवण्यासाठी बँकेला 55 ते 200 रुपयांपर्यंतचे हप्ते भरू शकतो. कामगार 60 वर्षांचा झाल्यावर त्याला 2,000 ते 5,000 रुपये पेन्शन मिळेल.