Lumpy Skin Disease: परराज्यातून गोव्यात पशुधन आणू नका- जिल्हाधिकाऱ्यांचा आदेश

Lumpy Skin Disease: राज्यातील वाढत्या लम्पी रोगाच्या पार्श्वभूमीवर सतर्कता आणि खबरदारीचा उपाय म्हणून 21 जानेवारीपासून परराज्यातून पशुधनाची वाहतूक करणाऱ्यास दक्षिण गोवा जिल्हाधिकाऱ्यांनी मनाई आदेश दिला आहे.

दक्षिण गोव्यात गुरे आणि म्हशींसारख्या पशुधनाची वाहतूक आणि प्रवेश 21 जानेवारीपासून प्रतिबंधित असल्याचा आदेश जारी करण्यात आला आहे.

गोव्यात गुरांना लम्पी रोगाची लागण मोठ्या प्रमाणात व्हायला सुरवात झाली असून या रोगामुळे गुरे दगावण्याचे प्रकार होत असल्याने दूध उत्पादकांना अतोनात नुकसान सोसावे लागत आहे. त्यामुळे सरकारने लंपी रोगाचा मुकाबला करताना युद्धपातळीवर उपाययोजना करावी, अशी मागणी झाली.

दगावल्या गेलेल्या गुरांप्रती दूध उत्पादकांना नुकसान भरपाई द्यावी, अशी मागणी अखिल गोवा दूध उत्पादक उत्कर्ष संघटनेने केली होती.

या रोगाची वाढ होऊ नये यासाठीच खबरदारीचा उपाय म्हणून 21 जानेवारीपासून परराज्यातून पशुधनाची वाहतूक करणाऱ्यास दक्षिण गोवा जिल्हाधिकाऱ्यांनी मनाई आदेश दिला आहे.