Encroachment in Bambolim : बांबोळीतील गाडेधारकांचे अतिक्रमण हटवलं

Encroachment in Bambolim : दिनदयाळ रोजगार योजनेतून बांबोळीत गोमेकॉ परिसरात गाडे घालण्यास मिळालेल्या चार गाळेधारकांनी नुकत्याच स्थलांतरित झालेल्या जागेवर अतिक्रमण केले होते. सांताक्रुझ पंचायतीने या अतिक्रमणाविषयी उपजिल्हाधिकाऱ्यांकडे तक्रार केली होती. ते अतिक्रमण हटविण्याचे आदेश आल्यानंतर पंचायतीने ते अतिक्रमण हटविले.

माजी मुख्यमंत्री मनोहर पर्रीकर यांच्या काळात दिनदयाळ रोजगार योजनेतून चारजणांना गोमेकॉच्या आवारात गाडे घालण्यास परवानगी दिली होती. परंतु त्यानंतर हळूहळू गाडेधारकांची संख्या 30 च्यावर गेली आणि रस्त्याच्या दोन्ही बाजूला विक्रेते बसू लागले. त्यामुळे गोमेकॉमध्ये येणाऱ्या रुग्णवाहिकांना याचा अडथळा होऊ लागला. त्यामुळे गोमेकॉ प्रशासनाने सांताक्रुझ पंचायतीकडे वारंवार तक्रार केल्यानंतर पंचायतीने उपजिल्हाधिकाऱ्यांकडे ही बाब मांडली होती. त्यानंतर उपजिल्हाधिकाऱ्यांच्या आदेशाने येथील दुकाने हटविण्यात आली.

दुकानांचा हक्क देताना मुख्यमंत्र्यांनी दुकानगाळ्यात बसूनच व्यापार करावा, रस्त्यावर दुकाने थाटू नयेत, असे सुचविले होते. परंतु त्यानंतरही त्याकडे विक्रेत्यांनी दुर्लक्ष केले. त्यामुळे सांताक्रुझ पंचायतीने या अतिक्रमण धारकांना तोंडी तसेच अतिक्रमण काढण्याबाबत लेखी सूचनाही दिली. अखेर पंचायतीने उपजिल्हाधिकाऱ्यांकडे तक्रार केली. त्या तक्रारीनुसार अखेर आज त्यांच्यावर पंचायतीने कारवाई केली. काही गाडेधारकांनी स्वतःहून अतिक्रमण काढून घेतले.