Fire in Goa Forests: राज्यातील अनेक भागात आग लागण्याच्या घटना सुरूच आहेत. नऊ दिवसांपूर्वी सत्तरीच्या साट्रे परिसरात लागलेली आग पसरत असून वनखात्याच्या आठ डोंगरमाथ्यावर आगीचे तांडव कायम आहे.
दुसरीकडे वनखाते, नौदल आणि वायुदलाच्या प्रयत्नांना काहीसे यश आला असून 16 ठिकाणच्या आग विझविल्याचा वनखात्याचा दावा आहे.
वनमंत्री विश्‍वजीत राणे यांनी सांगितले, की म्हादई, मोले, नेत्रावळी अभयारण्य, सरकारी जंगल, खासगी वन, कोमुनिदाद जमीन अशा अनेक ठिकाणी आग लागली आहे. ती विझवण्यासाठी वन खाते, अग्निशमन आणि अपत्कालीन यंत्रणा, हवाई व नौदल कार्यरत आहे.
अनेक ठिकाणच्या आग विझविण्यामध्ये यश आले असून आठ ठिकाणी आगीचे तांडव सुरू आहे. तर शनिवारी दिवसभरात वनखात्याने 16 ठिकाणची आग विझविली. याकरिता स्थानिक ग्रामस्थांनीही मोठी मदत केली.
दरम्यान, राज्यात वाढलेले तापमान आणि कमी झालेली आद्रता लक्षात घेऊन नागरिकांनी काय करावे आणि काय करू नये, यासंबंधीची जिल्हाधिकाऱ्यांची सार्वजनिक नोटीस जारी केली आहे. विविध भाषेतील ही नोटीस गावातील मुख्य वास्तू, सार्वजनिक स्थळे, दुकाने, आस्थापने आणि ग्रामस्थांनाही पत्रक स्वरूपात वाटण्यात येत आहे.
वायूदलाची दोन हेलिकॉप्टर्स सक्रिय
आज रविवारी आगीवर नियंत्रण मिळवण्यासाठी वायुदलाने दिलेली दोन्हीही हेलिकॉप्टर सकाळपासून कार्यरत होती. जवळच्या पाणवठ्यावरून पाणी उचलून हे पाणी दुर्गम भागातील आगीवर टाकण्यात येत आहे.
या हवाई टीम बरोबर ग्राउंड टीम एकत्रित काम करत असून यात प्रामुख्याने वनखात्याचे कर्मचारी आहेत. सोमवारी सकाळी हवाई पाहणीनंतर पुन्हा आग विझविण्याचे काम सुरू राहणार आहे.
आग सिद्धाच्या राय डोंगरावर
कासारपालकडून साळला जाणाऱ्या रस्त्यावर मध्येच वडावल हे गाव लागते. येथे गोव्यातील सर्वात जुने शिवलिंग आहे. या शिवलिंगाच्या डोंगरावर आग लागली आहे. ही आग साळ येथील डोंगरातून पसरत वडावलपर्यंत पोहोचली आहे.
याकडे अद्यापि वनखात्याचे लक्ष नसल्याचे नागरिकांनी सांगितले असून काही ठिकाणी स्थानिक लोक आग विझविण्यासाठी प्रयत्न करत आहेत.
डिचोलीत चारठिकाणी आग
डिचोली अग्निशमन दलाच्या कार्यक्षेत्रात आग लागण्याचे सत्र चालूच आहे. आज रविवारी चार ठिकाणी आग लागण्याच्या घटना घडल्याची माहिती अग्निशमन दलाने दिली.
पलतडवाडा-म्हावळींगे येथे गोठ्यासह काजू बागायतीला आग लागली. या आगीत काजूची झाडे आणि गोठा आगीत भस्मसात होवून एक लाखाहून अधिक रुपयांचे नुकसान झाले.
न्हावेली आणि धबधबा-डिचोली येथे गवताला आग लागली. तर शिरगाव येथेही खाण परिसरात आग लागली.
शर्थीचे प्रयत्न सुरू
अभयारण्य आणि वनखात्याच्या जमिनीत लागलेली आग विझविण्यासाठी शर्थीचे प्रयत्न सुरू असून यासाठी खात्याकडून अग्निशमन दल आणि हवाई दलाची मदत घेण्यात येत आहे.
सकाळी हवाई पाहणी केल्यानंतर आगीची ठिकाणे निश्‍चित करण्यात आली. आणि त्यानंतर त्यावर बॉम्बे बकेटच्या साह्याने पाणी टाकण्याची हेलिकॉप्टर मोहीम सुरू झाली.
39 दिवसांत 1600 कॉल्स
1 फेब्रुवारीपासून म्हणजे गत 39 दिवसांत अग्निशमन आणि आपत्कालीन सेवांना जवळपास 1600 कॉल्स आले आहेत. 83 टक्के म्हणजे 1300 कॉल्स आगीशी संबंधित होते आणि उर्वरित आपत्कालीन सेवा होत्या.
268 प्रकरणे जंगलातील वणव्याची आहेत आणि 642 प्रकरणे शेतात आणि कोरड्या गवताला लागलेली आग आहेत. 200 हून अधिक प्रकरणे घरे आणि दुकानांत आग लागल्याची नोंद आहे. 202 प्रकरणे अपघात आणि बचाव कार्याशी संबंधित प्रकरणे आहेत.
या ठिकाणी आग कायम
सुर्ला मोले-1 व 2
पोट्रे नेत्रावळी
कुमारी बीट
कोपार्डे बीट
शिगाव बीट
कुर्टी बीट
पालये
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
दैनिक गोमन्तक आता सर्व सोशल मीडिया प्लॅटफॉर्मवर. ताज्या घडामोडींसाठी फेसबुक, इन्स्टाग्राम, ट्विटर, शेअर चॅट आणि टेलिग्राम आम्हाला फॉलो करा. तसेच, दैनिक गोमन्तकच्या यूट्यूब चॅनेलला आजच सबस्क्राइब करा.
