Mahadayi Water Dispute: म्हादईप्रश्‍नी केंद्राकडे पाठपुरावा सुरू - मुख्यमंत्री

म्हादईप्रश्‍नी केंद्र सरकारकडे सक्षमपणे पाठपुरावा करण्यात येत आहे. या लढ्यामध्ये आता महाराष्ट्र राज्याचीही साथ मिळत असल्याने गोवा सरकारच्या वतीने कायदेशीर प्रक्रियेबरोबर राजकीय आणि तांत्रिक आघाड्यांवर मात करत ही लढाई आम्ही जिंकू, असा विश्‍वास मुख्यमंत्री डॉ. प्रमोद सावंत यांनी व्यक्त केला.

वास्को येथे भाजप राज्य कार्यकारिणीची बैठक झाल्यानंतर ते पत्रकारांशी बोलत होते. २०२४ मध्ये होणाऱ्या लोकसभा निवडणुकीत पुन्हा भाजपचेच सरकार निवडून येईल, असा दावा सावंत यांनी केला. या बैठकीत केंद्र आणि राज्य सरकारच्या विविध योजना लोकांपर्यंत पोचवण्याचा संकल्प करण्यात आला.

प्रामुख्याने अंत्योदय तत्त्वावर विकासाची दिशा, आत्मनिर्भर भारत आणि स्वयंपूर्ण गोवा या तत्त्वानुसार कार्य करण्याचे ठरले असून पक्षाच्या कार्यकारिणी सदस्यांसह कार्यकर्त्यांनीही या कामी स्वत:ला वाहून घ्यावे, असेही मुख्यमंत्री सावंत यावेळी म्हणाले. या बैठकीत महिला आणि युवकांना कौशल्य विकासामध्ये सक्षम करण्यावर भर देण्याचे ठरले असून स्वयंपूर्ण गोव्यासाठी युवक आणि महिलांनी उद्योजकतेकडे वळावे, असे सांगण्यात आले