सांगोल्‍डा येथील ‘फूड बँक फॉर पुअर’तर्फे अन्नदान

पणजी: सांगोल्‍डा येथील फूड बँक फॉर पुअर या संस्‍थेने रविवारी कामगार दिनानिमित्त हॉटेल नवतारा यांच्‍या संयुक्‍त विद्यमाने कामगारांसाठी अन्नदान हा उपक्रम राबवला. (food distribution program at Sangolda Goa)

संस्‍थेने पणजी, म्‍हापसा, मडगाव, कळंगुट आदी ठिकाणच्‍या सुमारे 4 हजार 400 कामगारांना अन्नदान केले, अशी माहिती संस्‍थेचे विश्‍वस्‍त डोनाल्‍ड फर्नांडिस यांनी दिली. याबाबत आम्‍ही दानशूर लोकांना एका ताटासाठी 40 रुपये देणगी देण्याचे आवाहन केले होते. यासाठी नवतारा हॉटेलमध्ये फूड बँक कूपन ठेवली होती. याला गोमंतकीयांनी चांगला प्रतिसाद दिला. याबद्दल लोकांचे आभार, अशी कृतज्ञता त्‍यांनी व्‍यक्‍त केली.

हॉटेल नवतारा ग्रुपने साधारणपणे जेवण केवळ 50 रुपयांत देऊन आपले सामाजिक उत्तरदायित्व पार पाडले. यासाठी ‍संस्‍थेचे 29 कार्यकर्ते सकाळपासून दुपारपर्यंत कार्यरत होते, अशी माहितीही फर्नांडिस यांनी दिली. दरम्‍यान, विविध ठिकाणच्‍या कामगारांनी फूड बँकेच्‍या या उपक्रमाविषयी समाधान व्‍यक्‍त केले.