Garbage Tempo Collapsed in Pond: पिकेन-चिवार येथील तळीत कोसळला कचराटेम्पो

Garbage Tempo Collapsed in Lake: हणजुणे-कायसूव ग्रामपंचायत क्षेत्रातील कचरा जमा करून नेत असताना ड्रायव्हरचे नियंत्रण सुटल्याने गुरुवारी सकाळी पिकेन-चिवार येथील तळीत टेम्पो कोसळला. प्रसंगावधान राखत टेम्पो ड्रायव्हरने तत्काळ बाहेर उडी घेतल्याने प्राणहानी टळली.

माजी सरपंच सावियो आल्मेडा यांच्या कार्यकाळात पंचक्रोशीतील कचरा गोळा करून तो साळगाव येथील कचरा प्रकल्पात टाकण्यासाठी सार्वजनिक निधीतून दोन टेम्पो खरेदी करण्यात आले होते, जे आजपर्यंत सेवा देत आहेत.

दरम्यान, दरदिवशी सकाळी सकाळी या भागातील शाळा-हायस्कूल्स सुरू होण्याच्या वेळेत असे कचरावाहू टेम्पो भरधाव वेगाने परिसरातून धावत असतात. त्यामुळे अशा अवजड वाहनांची वेळोवेळी तपासणी होणे आवश्यक असून चालकाची एखादी छोटीशी चूक मोठ्या अपघातास कारणीभूत ठरू शकते, असे या घटनेवरून दिसून येत असल्याचे स्थानिकांनी ‘दै. गोमन्तक’ला सांगितले.

कचरा वाहतूक करणाऱ्या टेम्पोवरील चालकांचीही सकाळच्या फेरीवेळी पोलिसांकडून अल्कोहोल तपासणी होणे आवश्यक असून संपूर्ण राज्यात कचरा वाहतूक सेवेत सुसूत्रता आणणे गरजेचे असल्याची अनेकांची मागणी आहे.