|
अवित बगळे
पणजी : कुजिरा बांबोळी येथील मुष्टीफंड आर्यन उच्च माध्यमिक विद्यालयाचा गौरव अवस्थी हा विद्यार्थी गोवा समान प्रवेश परीक्षेत (सीईटी) राज्यात प्रथम आला आहे. गौरवने सर्व विषयात पहिल्या क्रमांकाचे गुण प्राप्त करण्याचा मानही मिळवला आहे.
गेल्या शनिवारी, रविवारी तंत्रशिक्षण संचालनालयाने घेतलेल्या सीईटी परीक्षेचा निकाल आज जाहीर झाला. परीक्षेतील तीन विषयांतील १८ यशवंतांच्या क्रमांकांत पंधरा स्थानांवर मुष्टीफंड आर्यन उच्च माध्यमिकचे चार विद्यार्थी आहेत. प्रथम आलेल्या गौरव अवस्थी याला गणित व रसायनशास्त्र या विषयांत प्रत्येकी ७२, तर भौतिकशास्त्रात ७० गुण मिळाले आहेत. मुष्टीफंडची शेख रुबिया अब्दुल सलाम ही विद्यार्थिनी भौतिकशास्त्र विषयात ६६ गुणांनी द्वितीय क्रमांकावर असून गणित विषयात तिला ६७ गुण मिळाले आहेत. मुष्टीफंडच्या सिद्धान्‍त उदय गोवेकर या विद्यार्थ्याने गणित - ७१, रसायनशास्त्र ६९, भौतिकशास्त्रात ६३ गुण मिळवून परीक्षेत तिसरा क्रमांक पटकावला आहे. मुष्टीफंडच्याच कल्याण रघुवीर साळकर या विद्यार्थ्याने भौतिकशास्त्र ५८, गणित ७१ गुण मिळवून यशवंतांत स्थान मिळवले आहे.
मुष्टीफंडचे विद्यार्थी सातत्याने सीईटी परीक्षेत यश मिळवतात, सीईटीपेक्षा त्यांना देश पातळीवरील स्पर्धात्मक परीक्षा, संस्थांतील प्रवेशाकडे कल असतो, अशी माहिती विद्यालयाचे व्यवस्थापक व्यंकटेश प्रभुदेसाई यांनी दिली. कोविड प्रतिबंधात्मक विभागामुळे कांही विद्यार्थ्यांना सीईटी परीक्षा देणे शक्य झाले नसल्याचे त्यांनी सांगितले.
|
