काणकोण : काणकोण पालिकेच्या (Cancona Palika) पोर्तुगीजकालीन उद्यानाला (Garden) अवकळा आली आहे. या उद्यानाच्या देखभालीकडे पालिकेचे अक्षम्य दुर्लक्ष झाले आहे. काही वर्षे या उद्यानाची देखभाल काणकोणमधील पंचतारांकित हॉटेलतर्फे (Five Star Hotel) करण्यात येत होती. यापूर्वी या उद्यानात शोभेच्या झाडांची लागवड, विद्युत रोषणाई, तसेच नियमीत देखभाल हॉटेल अस्थापनातर्फे करण्यात येत होती. मात्र, गेली दोन वर्षे हॉटेल व्यवस्थापनाने त्याच्या देखभालीकडे दुर्लक्ष केले आहे.
सध्‍या गेल्या वर्षापासून कोविड महामारीमुळे उद्यान बंद आहे. देखभालीअभावी उद्यानात झाडी वाढली आहे. उद्यानात माणसांचा वावर नसल्याने बेडूक व त्यांना भक्ष्य बनवण्यासाठी सापांची संख्या वाढली आहे. त्यामुळे उद्यानातील झाडे व गवत कापून साफसफाई करण्याची गरज चावडी येथील शंकर नाईक यांनी केली आहे. पावसाळ्यापूर्वी चावडी वार्डाचे नगरसेवक रमाकांत नाईक गावकर यांनी वीज तारांवर लोंबकळणाऱ्या झाडांची छाटणी करून घेतली होती. त्यापूर्वी या झाड्यांच्‍या फांद्याचे वीज तारांना घर्षण होऊन वारंवार या भागाचा वीजपुरवठा खंडित होत होता. उद्यानात बालकांसाठी झोपाळे, घसरगुंडी व अन्य सोयी आहेत. मात्र, त्याची देखभाल होत नसल्याने त्यांना गंज चढला आहे.
उद्यानाचे लवकरच नूतनीकरण
चावडी येथील उद्यान पोर्तुगीजकालीन आहे. त्याचे नूतनीकरण करण्याचा प्रस्ताव तयार केला आहे. त्यासंदर्भात पालिका मंडळाने ठराव समंत केला आहे. हा प्रस्ताव जीसुडा यंत्रणेला पाठवून त्याच्या योजनेतून उद्यानाचे नूतनीकरण करण्यात येणार असल्याचे चावडी वार्डाचे नगरसेवक रमाकांत नाईक गावकर यांनी सांगितले.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
