केजरीवाल यांचा माझ्यावर विश्वास, बाणस्तारी अपघाताबाबत पालेकरांचं स्पष्टीकरण
Amit Palekar मागील काही दिवसांपासून चर्चेत असलेले 'आप'चे अमित पालेकर यांचे कार्यक्षेत्र वाढवून त्यांना आता सिंधुदुर्गातही संघटनात्मक कामावर लक्ष देण्यास सांगितले आहे. दिल्लीचे मुख्यमंत्री अरविंद केजरीवाल यांच्या निवासस्थानी मंगळवारी (ता.१२) सायंकाळी ६.३० वाजता अडीच तास झालेल्या बैठकीत हा महत्त्वपूर्ण निर्णय घेण्यात आला आहे.
बैठकीत बाणस्तारी अपघातात प्रकरणी चर्चा झाली का, असे पालेकरांना विचारल्यावर ते म्हणाले, केजरीवाल यांचा माझ्यावर विश्वास आहे. त्यांनी तुम्ही जे केले असेल ते योग्यच असेल असे सांगत याविषयाची चर्चा अधिक वाढवली नाही.
याशिवाय दिवाळीदरम्यान केजरीवाल यांच्यासह राघव चढ्ढा, आतिशी आदी नेते गोव्याच्या दौऱ्यावर येण्याचे नियोजन या बैठकीत करण्यात आले आहे.
या बैठकीनंतर पालेकर यांनी ‘दै. गोमन्तक’ला सांगितले, की प्रामुख्याने संघटनात्मक बाबींवर चर्चा करण्यासाठी ही बैठक झाली. संघटनात्मक पातळीवर हाताळण्याचे मुद्दे, लोकांसमोर कोणते मुद्दे घेऊन जायचे आहेत, याविषयी चर्चा केली.
त्यादृष्टीने स्थानिक पातळीवर केलेल्या तयारीचा आढावा घेण्यात आला. गोवा राज्य प्रभारी म्हणून दीपक सिंघला, सहप्रभारी म्हणून चेतन रावल यांच्याकडे जबाबदारी देण्यात आली आहे. पंजाबमधील नेते सतबीर हे समन्वयक म्हणून पाहणार आहेत.
लोकसभा निवडणूक लढवण्याच्या तयारीचा आढावाही घेण्यात आला. पक्षाने ही निवडणूक स्वतंत्रपणे लढवावी की नाही याचा निर्णय ‘इंडिया’ आघाडीच्या जागा वाटप बैठकीनंतर घेतला जाणार आहे.
पक्ष राष्ट्रीय पातळीवरचा असल्याने काही निर्णय हे दिल्लीत घेतले जातील. या बैठकीला सिद्धेश भगत, सर्फराज अंकलगी, संदीप पाठक आदी उपस्थित होते.
पक्षाची राज्य कार्यकारिणी येत्या आठवडाभरात जाहीर केली जाणार आहे. संघटनात्मक कामाला बळकटी देण्यासाठी योग्य अशा व्यक्तींना कार्यकारिणीत स्थान देण्याचे बैठकीत ठरले आहे. - ॲड. अमित पालेकर, ‘आप’चे राज्य संयोजक
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
दैनिक गोमन्तक आता सर्व सोशल मीडिया प्लॅटफॉर्मवर. ताज्या घडामोडींसाठी फेसबुक, इन्स्टाग्राम, ट्विटर, शेअर चॅट आणि टेलिग्राम आम्हाला फॉलो करा. तसेच, दैनिक गोमन्तकच्या यूट्यूब चॅनेलला आजच सबस्क्राइब करा.