पणजी : गोव्यातील (Goa) प्रत्येक नागरिकास कोविड प्रतिबंधक लसीची पहिली मात्रा देईपर्यंत पर्यटन क्षेत्र (Tourist Area) खुले करण्यास मुख्यमंत्री डॉ. प्रमोद सावंत (CM Dr. Pramod Sawant) यांनी पुन्हा एकदा नकार दिला आहे. या संदर्भातात विचारले असता ते म्हणाले, कोविडच्या तिसऱ्या लाटेची चर्चा सध्या सुरू आहे. त्याबाबत निश्चित काही सांगता येत नाही. सरकार सर्व परिस्थितीवर लक्ष ठेवून आहे. पर्यटन क्षेत्र कधी खुले होईल याची विचारणा बर्‍याचदा केली जाते. येत्या 30 जुलैपर्यंत राज्यातील प्रत्येक नागरिकास कोविड प्रतिबंधात्मक लसीची पहिली मात्रा देण्याचे लक्ष्य सरकारने ठेवले आहे. प्रत्येकास या लसीची पहिली मात्रा दिल्यानंतरच पर्यटन क्षेत्र खुले करण्याबाबत निर्णय घेतला जाईल.
गोव्यामध्ये सर्वसाधारणपणे ऑक्‍टोबरपासून पर्यटन हंगामास सुरुवात होते. किनाऱ्यावर तात्पुरत्या स्वरूपात घालण्यात येणाऱ्या शॅकसाठी सप्टेंबर मध्ये परवाने देणे सुरू होते. त्यानंतर ऑक्‍टोबरपासून पर्यटन हंगाम सुरू होतो तो मे महिन्याच्या मध्यापर्यंत सुरू असतो. पावसाळी पर्यटनासाठी देशी पर्यटकांनी गोव्याला गेल्या काही वर्षांमध्ये पसंती दिली आहे. मात्र सध्या कोविड संचारबंदी लागू असल्यामुळे हॉटेल्स बंद आहेत.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.