Goa : अन्वरला न्यायालयाची नोटीस

मडगाव ः (Madgaon -Goa) सावनूर (Savnoor) येथे खून करण्यात आल्याने सध्या चर्चेत असलेला कुख्यात गुंड टायगर अन्वर (Anwar) याचे नाव पुन्हा एकदा चर्चेत आले आहे. त्याच्यावर आर्लेम येथे झालेल्या खुनी हल्ला प्रकरणात साक्ष देण्यासाठी त्याने ३१ ऑगस्ट रोजी न्यायालयात उपस्थित राहावे, अशी नोटीस दक्षिण गोवा (South Goa)अतिरिक्त सत्र न्यायालयाने जारी केली आहे. अतिरिक्त सत्र न्यायाधीश व्हिन्सेंट डिसिल्वा यांनी काल मंगळवारी ही नोटीस जारी केली आहे. आता या प्रकरणातील तक्रारदार असलेला अन्वर मृत झाला आहे, हे अभियोग पक्ष आणि फातोर्डा पोलिसांना न्यायालयाला कागदोपत्री पुराव्यासह पटवून द्यावे लागणार आहे. सहा महिन्यांपूर्वी अन्वरवर व्हेली डिकॉस्ता गँगकडून त्याच्यावर हा जीवघेणा हल्ला झाला होता. व्हेली डिकॉस्ता याची गॅंग सावर्डे कुडचडे परिसरात बेकायदेशीर रेती व्यवसायात गुंतली असताना त्यांच्या या धंद्यात अन्वर नाक खुपसू पाहत होता. या प्रकरणातून हा हल्ला करण्यात आला होता, असे सांगण्यात येते. या प्रकरणात व्हेली डिकॉस्ता व रिकी होर्णेकर यांच्यासह सहा जणांवर आरोपपत्र दाखल केले आहे. या प्रकरणातील प्रमुख संशयितांपैकी एक असलेल्या रिकी होर्णेकर याला जामिनावर मुक्त करण्यात आले.

गुन्ह्यांचे काय होणार?
खुनी हल्ले, मारहाण, अपहरण, धमक्या देणे, खंडण्या वसूल करणे अशा अनेक गुन्ह्यात समावेश असलेल्या अन्वरवर दक्षिण गोव्यात ५ पोलिस स्थानकावर २६ गुन्हे नोंद आहेत. अन्वर मृत पावल्याने आता या सर्व गुन्ह्यांची फाईल बंद होणार असली तरी काही प्रकरणात त्याच्याबरोबर अन्य साथीदार गुंतले आहेत. त्यांच्यावर मात्र सुनावणी चालू राहणार आहे. केपे येथील एका मुलीचे अपहरण करून तिच्यावर बलात्कारकेल्या प्रकरणी सध्या सध्या मडगाव सत्र न्यायालयात सुनावणी चालू आहे. अन्वरच्या अन्य तीन साथीदारावर हा खटला चालू राहणार. त्यापूर्वी शेल्डे येथील एका मटकेवाल्याचे अपहरण करून त्याला मारहाण करून पाय मोडल्या प्रकरणी कुडचडे पोलिसांनी अन्वर व त्याच्या अन्य दोन साथीदारावर खुनाचा प्रयत्न करण्याच्या गुन्ह्याखाली आरोपपत्र दाखल केले आहे. हाही खटला चालू राहणार आहे.