माजी आमदार ग्लेन टिकलो यांना जीवे मारण्याची धमकी! कारचेही केले नुकसान; वाचा सविस्तर प्रकरण

नुकत्याच झालेल्या रोड-रेज घटनेत हळदोणाचे माजी आमदार ग्लेन टिकलो यांना धमकावल्या आणि त्यांच्या कारचे नुकसान केल्याप्रकरणी कळंगुट पोलिसांनी दोघांना अटक केली.

पोलिसांनी दिलेल्या माहितीनुसार, शुक्रवारी रात्री 11.45 वाजता आमदार ग्लेन टिकलो कळंगुट येथील एका रिसॉर्टमधून बाहेर पडत असताना एका दुचाकीस्वाराने रस्ता अडवत असल्याचा दावा करत त्यांच्याशी वाद घातला. (Threatening former Aldona MLA Glenn Ticlo)

हा वाद पुढे वाढला आणि सर्वेश दिवकर या दुचाकीस्वाराने त्याच्या दोन मित्रांना घटनास्थळी बोलावले आणि तिघांनी टिकलो यांच्या कारची नासधूस करायला सुरुवात केली. तसेच त्यांना व कारमध्ये असलेल्या अन्य एका व्यक्तीला जीवे मारण्याची धमकीही त्या तिघांनी दिली.

माल्कम फर्नांडिस आणि जेलोन अशी या दोन मित्रांची नावे आहेत. दिवकर आणि फर्नांडिस हे दोघे नागोवा येथील रहिवासी असून कळंगुट पोलिसांनी त्यांना अटक केली.

भारतीय दंड संहितेच्या तरतुदीनुसार या आरोपींवर गुन्हा दाखल करण्यात आला आहे. या संपूर्ण घटनेचा पुढील तपास सुरू आहे.