Goa Crime : अल्पवयीन मुलींवर लैंगिक अत्याचार

Goa Crime : रायबंदर व मडगाव येथील भागात अल्पवयीन मुलींवरील लैंगिक अत्याचारप्रकरणी संबंधित क्षेत्रातील पोलिस स्थानकांत संशयितांविरुद्ध गुन्हा दाखल झाला आहे. मात्र, या संशयितांना अटक करण्यात आलेली नाही. पीडित मुलींनी दिलेल्या तक्रारीनुसार, पोलिसांनी त्यांची जबानी एनजीओच्या उपस्थितीत नोंद केली आहे. संशयितांचा शोध घेण्यात येत आहे.

रायबंदर येथील मंजुनाथ रमेश अथोले (२०) याने पीडित मुलीला आमिषे दाखवून तिच्यावर लैंगिक अत्याचार केला. या प्रकरणाची तक्रार मुलीने पणजी महिला पोलिस स्थानकात बुधवारी (ता.२४) दाखल केली होती. तपास अधिकारी तथा उपनिरीक्षक मनीषा म्हार्दोळकर यांनी एनजीओच्या उपस्थितीत पीडित मुलीची जबानी नोंदवून बलात्कार, बाल कायद्याच्या कलम ८(२) तसेच पॉक्सो कायदाच्या कलम ४ खाली गुन्हा दाखल केला आहे.

संशयित मंजुनाथ हा मूळचा हवेरी-कर्नाटक येथील असून सध्या तो रायबंदर येथे राहत होता. गोमीसवाडा-माजोर्डा येथे राहत असलेल्या अल्पवयीन मुलीला संशयित राहुल चंद्रा (२८) याने आमिषे दाखवून तो घरातून घेऊन जात होता. मडगाव येथील एका फ्लॅटमध्ये नेऊन त्याने तिच्यावर अनेकदा लैंगिक अत्याचार केल्याने ती गरोदर राहिली. ही गोष्ट आपल्या आईवडिलांना सांगण्यास ती अल्पवयीन मुलगी घाबरत होती.

एनजीओच्या उपस्थितीत पीडितेची जबानी

अत्याचाराचा प्रकार उघडकीस आल्याने पीडितेच्या आईने मडगाव पोलिस स्थानकात तक्रार दिल्यावर गुन्हा दाखल केला आहे. संशयित राहुल हा मूळचा पश्‍चिम बंगाल येथील असून त्याची ओळख पीडित मुलीशी झाली होती. मडगाव पोलिसांनी एनजीओच्या उपस्थितीत पीडित मुलींची जबानी नोंदवून बलात्कार, बाल कायद्याच्या कलम ८(२) तसेच पॉक्सो कायद्याच्या कलम ४ खाली गुन्हा दाखल केला आहे.