Goa: मुसळधार पावसामुळे वास्कोसह इतर भागात पूरस्थिती

काल रात्रीपासून पडत असलेल्या मुसळधार पावसाने (rainy season) वास्को (Vasco) शहराला झोडपून काढले.त्यामुळे जनजीवन विस्कळीत झाल्याचे पाहायला मिळाले. वास्तूतील जवळ-जवळ सर्वच मुख्य रस्त्यांवर पावसाचे पाणी भरून राहिल्याने पूरस्थिती (Flood) निर्माण झाली होती. पण दुपारनंतर पावसाने थोडी उसंत घेतल्याने लोकांना दिलासा मिळाला.

काल रात्री व आज सकाळपासून पडलेल्या मुसळधार पावसाने संपूर्ण वास्को शहरासह इतर भागांना अक्षरशः झोडपून काढले. अविरत पडलेल्या पावसामुळे शहरातील तसेच इतर ठिकाणचे रस्ते पाण्याखाली गेले होते. बऱ्याच ठिकाणी दुकानात पाणी शिरल्याने दुकानदारांची तारांबळ उडाली. रस्त्यावर पार्क करून ठेवलेली चार चाकी वहाने, दुचाक्या पाण्याखाली जाऊ लागल्या होत्या. तसेच येथील स्वातंत्र पथ मार्ग, एफ एल गोम्स मार्ग तसेच इतर बऱ्याचशा रस्त्यांवर पाणी भरून राहिल्याने वाहनचालकांना भरपूर त्रास झाला. पाण्यातून वाट काढत काढत वाहने पुढे सरकत होती, तर काही ठिकाणी पाण्यात वाहने बंद पडल्याचे पाहायला मिळाले. गटारातील घाण भर रस्त्यावरून वाहत होती. पालिकेतर्फे मान्सूनपूर्व कामे न झाल्याने आज वास्को वासियांना पूरस्थितीचा सामना करावा लागला.

गटारांची साफसफाई न झाल्यानेच सदर पूरस्थिती निर्माण झाली.त्यामुळे पालिका कर्मचारी आज जिकडे तिकडे धावाधाव करताना दिसले. मात्र गटारातील कचरा तुडुंब भरलेला असल्याने पाण्याचा निचरा होण्यासाठी मार्ग नव्हता. पाण्याचा योग्यरीत्या निचरा होत नसल्याने संपूर्ण शहर पाण्याखाली गेल्याचे पाहण्यात आले. दरम्यान दुपारी एक नंतर पावसाने उसंत घेतली, तसे रस्त्यावरील पाण्याची पातळी थोडीफार उतरली खरी, मात्र गटारात पाणी तसेच भरलेले होते. कारण गटारांची साफसफाई न झाल्याने गटारातून पाण्याचा निचरा होत नव्हता. आजच्या पूरस्थिती मुळे पालिकेच्या बेभरवशाच्या कमिटीचे धिंडवडे उडाले. संतापलेले नागरिक पालिकेच्या नावाने बोटे मोडताना दिसत होते. वास्को शहरासह बायणा, मायमोळे, वाडे येथेही पूरस्थिती निर्माण झाल्याचे पाहायला मिळाले.