IFFI Goa 2022: ‘क्लिंटन’ने जिंकली सर्वांची मनं!

53rd IFFI 2022: मला बोर्डिंग स्कूलमध्ये पाठविल्याबद्दल पूर्वी माझ्या पालकांवर मी नाराज असायचो. मात्र आता मी त्यांचा आभारी आहे. कारण त्यामुळे मला माझा चित्रपट बनवताना मदत झाली, असे दिग्दर्शक पृथ्वीराज दास गुप्ता यांनी ‘इफ्फी टेबल टॉक्स’ सत्रात संवाद साधताना सांगितले. त्यांचा ‘क्लिंटन’ हा चित्रपट पश्चिम बंगालच्या कालिम्पॉंग येथील बोर्डिंग स्कूलमधील त्यांच्या स्वतःच्या अनुभवांवरून प्रेरित आहे.

शाळेतील दादागिरीचा सामना करताना 10 वर्षांच्या क्लिंटनने दाखवलेल्या दयाळूपणा आणि धैर्याविषयी हा चित्रपट आहे. मुले जगाकडे कशी पाहतात आणि त्याला कसा प्रतिसाद देतात याचा हा धडा आहे. ‘क्लिंटन’ हा इंग्रजी भाषेतील नॉन-फिचर चित्रपट आहे, जो इफ्फीतील भारतीय पॅनोरमा विभागाचा भाग होता.

पृथ्वीराज दास गुप्ता पुढे म्हणाले, केवळ मीच ही कथा सांगू शकलो असतो, कारण ते मी प्रत्यक्ष जगलो आहे आणि मी या कथेला तो खरेपणा देऊ शकलो असतो. हा चित्रपट केवळ शाळांमध्येच नाही तर अशा ठिकाणी देखील प्रदर्शित केला जाईल जिथे प्रौढ प्रेक्षक देखील तो पाहू शकतील, जेणेकरून त्यांना मुले कशी वागतात हे समजेल.