53rd IFFI 2022: यंदा इफ्‍फीला अभूतपूर्व प्रतिसाद लाभतोय- रवींद्र भाकर

53rd IFFI 2022: राज्यात सुरू असलेल्या भारताच्या 53व्या आंतरराष्ट्रीय चित्रपट महोत्सवाला अभूतपूर्व प्रतिसाद लाभत आहे. आतापर्यंत 10 हजारांहून अधिक प्रतिनिधींनी नोंदणी केली आहे. या महोत्‍सवासाठी पहिल्यांदाच 39 देशांतील प्रतिनिधी सहभागी झाले आहे.

त्‍यात अमेरिका, रशिया, युके, दक्षिण कोरिया, फ्रान्स आधी देशांचा समावेश आहे, अशी माहिती राष्ट्रीय चित्रपट विकास महामंडळाचे सीईओ रवींद्र भाकर यांनी दिली. मिड फेस्टिवल पत्रकार परिषदेमध्ये ते बोलत होते. यावेळी माहिती आणि प्रसारण मंत्रालयाचे सचिव अपूर्व चंद्र उपस्थित होते.

डॉ. भाकर म्हणाले, कोरोनाच्‍या दोन वर्षानंतर प्रत्यक्ष हा चित्रपट महोत्सव होत आहे. यामुळे देशाबरोबर परदेशातूनही सिनेरसिकांनी महोत्सवासाठी प्रतिसाद दिला आहे. यंदा महोत्सव अधिक यशस्वी करण्यासाठी माहिती आणि प्रसारण मंत्रालयाबरोबर गोवा सरकारने विशेष मदत केलीय. यंदा प्रथमच 39 देशांतील प्रतिनिधी या महोत्सवाला उपस्थित आहेत.

अमेरिकेचे शिष्‍टमंडळ मोठे

महोत्‍सवात सर्वांत मोठे शिष्टमंडळ अमेरिकेचे असून त्या खालोखाल रशियाचे प्रतिनिधी सहभागी झाले आहेत. महोत्सवात विविध विभागांमध्ये 79 देशातील 100 पेक्षा जास्त चित्रपटांचे प्रदर्शित झालेले आहेत. अजून 180 चित्रपटांचे प्रदर्शन होणार आहे. शिवाय त्या महोत्सवाच्या निमित्ताने आयोजित केलेल्या ‘फिल्म बझार’ला निर्माते- दिग्दर्शकांनी मोठा प्रतिसाद दिला आहे.