पणजी: काही दिवसापुर्वी बंगालच्या उपसागरात (Bay of Bengal) तयार झालेल्या ‘गुलाब’ (Gulab Cyclone) चक्रीवादळाची तीव्रता सध्या कमी झाली आहे. पण, आज बुधवारीही गोवा (Goa) राज्यात पावसाची शक्यता कायम असणार आहे. कारण येत्या 30 सप्टेंबरपर्यंत पुन्हा ‘शाहीन’ वादळाची निर्मिती होण्याची शक्यता राज्य हवामान खात्याने वर्तविली आहे.
काही दिवसांपूर्वी बंगालच्या उपसागरात तयार झालेले ‘गुलाब’ चक्रीवादळ गुजरातच्या दिशेने जात आहे. 30 सप्टेंबरपर्यंत हे वादळ गुजरात किनारपट्टीवर जावून नष्ट होईल. पण, त्याचवेळी ‘शाहीन’ (Cyclone shaheen) या नव्या वादळाची निर्मिती होण्याची शक्यता आहे. हे वादळ पुढे पाकिस्तान, सौदी अरेबियाच्या दिशेने जाईल. त्यामुळे त्याचा भारताला कोणताही धोका नसणार, असे गोवा हवामान खात्याचे शास्त्रज्ञ राहुल एम. यांनी सांगितले.
‘गुलाब’ चक्रीवादळाचा राज्यावरील प्रभाव आज दिवसभर कायम राहील. त्यामुळे राज्यातील काही भागांत मुसळधार पावसासह ताशी 40 किमी वेगाने वारे वाहण्याची शक्यता आहे. त्यामुळे मच्छिमारांनाही खोल समुद्रात न जाण्याची सूचना करण्यात आल्याची माहिती आहे, राहुल एम. यांनी दिली.
दरम्यान, यावर्षीचा मान्सून हंगाम संपण्यास केवळ दोन दिवस शिल्लक राहिले आहेत.1 जून ते 28 सप्टेंबर या कालावधीत राज्यात 121.85 इंच पावसाची नोंद झाली आहे. हा पाऊस मागील वर्षाच्या तुलनेत या वर्षी पाच टक्के अधिक झाला आहे. गेल्यावर्षी याच कालावधीत राज्यात 116.46 इंच पावसाची नोंद झाली होती.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
