'मराठी साहित्य संमेलन' आजपासून होणार सुरू..!

मोरजी (Goa News): एका तपानंतर गोमंतक साहित्य सेवक मंडळाचे 28 वे गोमंतक मराठी साहित्य संमेलन आजपासून सुरु होणार आहे. दोन दिवस साहित्याचा जागर संत सोहिरोबानाथ आंबिये नगर वळपे येथे होणार आहे. हे संमेलन एका तपानंतर तेही पेडणे तालुक्यात मराठी प्रेमींच्या बालेकिल्ल्यात होत आहे. ते संमेलन यशस्वी व्हावे आणि या सरस्वतीच्या सेवेला पेडणेच्या श्री भगवती देवीचा आशीर्वाद मिळून ते यशस्वी व्हावे, यासाठी 26 रोजी कार्याध्यक्ष राजमोहन शेट्ये, पत्रकार उमेश गाड व चंद्रकांत सांगळे यांच्या उपस्थितीत श्रीफळ ठेवून आशीर्वाद घेतले.

यावेळी राजमोहन शेट्ये म्हणाले, की 20 वर्षानंतर पेडणेत आणि 12 वर्षानंतर गोव्यात साहित्य सेवक मंडळाचे संमेलन होत आहे. तपा नंतरचे हे संमेलन महत्वाचे आहे, देवीचा आशीर्वाद घेतला गेला. मराठीची वाटचाल पुढे नेण्यासाठी आणि मराठीचे महत्व पटवून देण्यासाठी आणि दरवर्षी हे संमेलन व्हावे असे सांगून सर्वांनी यात साहित्यिक आणि साहित्य प्रेमींनी सहभाग दाखवावा असे आवाहन केले. मराठीसाठी आंदोलनापेक्षा मराठीची वेगळ्या पद्धतीने चळवळ उभारून आणि जागृती करून मराठीला तिला तिच्या हक्काचे स्थान मिळवून देण्यासाठी हा व्यापक उपक्रम असल्याचे ते म्हणाले. चंद्रकांत सांगळे म्हणाले या संमेलनात खास पुस्तकांचे दालन चीत्रकारांचे प्रदर्शन होणार आहे हि एक पर्वणी आहे असे ते म्हणाले.

उमेश गाड म्हणाले, हे संमेलन ही एक पर्वणी आहे गेल्या वीस वर्षापूर्वी श्री भगवती मंदिर प्रांगणात हे संमेलन भरवले होते. आता पुन्हा 20 वर्षानंतर संत सोहिरोबानाथ अंबिये महाविद्यालयातील सभागृहात होत आहे. हा मराठीचा एक जागर असून मराठी प्रेमीना एक पर्वणी ठरणार आहे ते यशस्वी करण्याचे आवाहन उमेश गाड यांनी केले.