Goa News: कार्डियाक युनिटला डॉ. मंजुनाथ देसाईंचे नाव द्या - प्रमोद सावंत

Goa News: अखेरच्या श्‍वासापर्यंत रुग्णांसाठी धडपडणाऱ्या डॉ. मंजुनाथ देसाई यांच्यावरील माहितीपट पाहून आज आरोग्यमंत्र्यांसह उपस्थितांचे डोळे पाणावले. १० हजारांहून अधिक हृदय शस्त्रक्रिया करणाऱ्या देसाईं यांचे गोमेकॉच्या कार्डियाक युनिटच्या उभारणीत महत्त्वाचे योगदान आहे.

त्यामुळे नव्याने उभारण्यात येणाऱ्या सुपर स्पेशिलिटी ब्लॉकच्या कार्डियाक विभागाला त्यांचे नाव देणार, अशी घोषणा मुख्यमंत्री डॉ. प्रमोद सावंत यांनी केली. दरबार हॉलमध्ये दिवंगत डॉ. मंजुनाथ देसाई यांच्या स्मृतीप्रित्यर्थ व्याख्यानाचा कार्यक्रम आयोजित करण्यात आला होता.

यावेळी राज्यपाल पी. एस. श्रीधरन पिल्लई, आरोग्यमंत्री विश्‍वजीत राणे, केंद्रिय मंत्री श्रीपाद नाईक, डॉ. थिओडोर अब्राहम, डॉ. गुरूप्रसाद नाईक आदी उपस्थित होते. कार्यक्रमात देसाई यांच्या आयुष्यपटावरील माहितीपट सादर करण्यात आला.

यावेळी राज्यातील अनेक मंत्र्यांसह आमदार, ॲड. जनरल देविदास पांगम, उद्योगपती श्रीनिवास धेंपो व गोमॅकोच्या विविध विभागाचे प्रमुखांसह मान्यवरांनी हजेरी लावली.

सदैव समाजाचा विचार

मुख्यमंत्री सावंत म्हणाले, डॉ. देसाई यांनी सदोदित इतरांचा विचार केला. कार्डियालॉजी विभागातील कर्मचाऱ्यांचे वेतन वाढावे, अशी त्यांची शेवटची इच्छा होती. यासाठी ते सतत प्रयत्न करीत होते. त्यांनी आपल्यासाठी, आपल्या कुटुंबियांसाठी कधीच काही मागितले नाही. नेहमी समाजाचा विचार करणारे ते डॉक्टर होते.